“Manchester Yunayted” safidagi o‘yinlari bilan mashhurlikka erishgan Jorj Bestning jurnalistlarga aytgan so‘nggi so‘zlari shunday bo‘lgan: “Men kabi o‘lmang”. Irlandiyaning shimolida tug‘ilgan futbolchi chap qanot yarim himoyasida o‘ynagan va 28 yoshida faoliyatini yakunlagan. Quyida iste’dod bo‘yicha Pele va Maradonadan o‘tib ketishi kutilgan iqtidor egasi qanday qilib o‘z faoliyatini barbod qilgani va operatsiya ham uning hayotini saqlab qolmagani haqida so‘z boradi.
Jorj Best XX asrning eng yaxshi futbolchilaridan biri, shuningdek, Shimoliy Irlandiya va “Manchester Yunayted”ning XX asrdagi eng zo‘r o‘yinchisi bo‘lgan. U haqida “Maradona GOOD, Pele BETTER, George BEST” (Maradona yaxshi, Pele yaxshiroq, Jorj eng yaxshi) degan jumlalar o‘ylab topilgandi. Hayotining qorong‘i tomoni esa maydondan tashqarida bo‘lgan. Tungi klublar, qizlar, alkogol, mast holda janjal qilish va politsiya bilan mojarolar. Va bularning barchasi futbolchi 22 yoshligida yuz bergan.
Best 1946-yilning 22-may sanasida Shimoliy Irlandiyaning Kregag shahrida tug‘ilgan. Onasi va do‘stlarining so‘zlariga ko‘ra, u futbolga bo‘lgan muhabbat bilan ulg‘aygan. Best “Kregag Boyz” yoshlar jamoasida o‘ynayotgan vaqtda skautlar e’tiboriga tushgan va ko‘rik uchun “Manchester Yunayted”ga taklif qilingan. Jorj kuchli stress va uy sog‘inchi tufayli 2 kundan keyin Shimoliy Irlandiyaga qaytib keladi. Lekin “qizil iblislar” unga ikkinchi imkoniyatni taqdim etadi va Jorj undan unumli foydalanadi.
Futbolchi 17 yoshida “Manchester Yunayted” bilan shartnoma imzoladi. Uning jamoadagi dastlabki davri “Manchester Yunayted”ning inqirozli davriga to‘g‘ri keldi, chunki avvalroq “qizil iblislar”ning ko‘plab futbolchilari halok bo‘lgan va 19 nafari og‘ir jarohat olgan aviahalokat yuz bergandi. Ammo Jorj yo‘qolib qolmadi va birinchi mavsumida 26 ta o‘yinda oltita gol kiritdi. 17 yoshli qanot yarim himoyachisi uchun bu mo‘jiza hisoblanardi. Keyingi mavsumlarda ham rivojlanishdan to‘xtamadi, Britaniyadagi eng mashhur odam va haqiqiy brendga aylandi.
Best o‘zining butiklari, barlari, tungi klublarini ochdi va reklama roliklarida suratga tushdi. Va bularning barchasini 19 yoshida amalga oshirdi. Jorj 1960-yillarning Bekhemi edi, futbolchi keyingi mavsumlarda ham o‘sib bordi. Uning eng yaxshi o‘yini 1967/68-yilgi mavsum Chempionlar Kubogi finalidan o‘rin olgan “Benfika”ga qarshi bahsga to‘g‘ri keldi. Ushbu o‘yinda “Manchester Yunayted” “Benfika”ni 4:1 hisobida mag‘lub etdi, Best bitta gol urdi. “Qizil iblislar” Yevropa Chempionlar Kubogida g‘alaba qozongan birinchi ingliz klubiga aylandi.
Mavsum yakuniga ko‘ra, 53 ta o‘yinda 32 ta gol urgan Jorj Best “Oltin to‘p” sohibiga aylandi. Futbolchi “Manchester Yunayted” muxlislarining mehrini qozondi.
Shundan so‘ng Best barlarga borish, janjallashish, o‘g‘rilik qilish va mast holda avtomobil boshqarishni boshladi. Jorj keyingi to‘rt mavsumda bularning barchasini futbol bilan yonma-yon bajarishga muvaffaq bo‘ldi, lekin janjallar borgan sari ko‘payib bordi. Bir safar futbolchi yo‘qolib qoldi va bir hafta davomida topilmadi. Best qaytib kelgandan keyin kechirim so‘radi, lekin klub direktoriga bu yoqmadi. Keyinchalik Best yanada ko‘proq janjallarga aralashishni boshladi va klubdan haydaldi. Shundan so‘ng ko‘p ichishni boshladi, xotini bilan janjallashdi, Avstraliya, Hindiston, Amerika klublarini va pastki liganing autsayder jamoalarini aylanib chiqdi.
Faoliyatini tiklash uchun so‘nggi umid uning “Fulhem”dagi ikki mavsumi bo‘ldi. Futbolchi 48 ta o‘yin o‘tkazdi, 11 ta gol urdi va ko‘plab golli uzatmalarni amalga oshirdi. Ammo bu ikki mavsum uning uchun “Fulhem” tarkibidagi so‘ngisi bo‘ldi.
Faoliyati yakunlanganidan keyin ham Best janjallarga aralashishdan to‘xtamadi. Xotini Jorj tomonidan kaltaklangani uchun ajrashishga ariza berdi va uni tashlab ketdi. Sobiq futbolchi buni o‘zi ochgan barda ichish uchun yana bir sabab deb hisobladi.
2002-yilga kelib u o‘z obro‘si bilan birga jigarini ham o‘ldirdi. Jorj shoshilinch va deyarli bepul jigar ko‘chirib o‘tkazish operatsiyasini boshidan o‘tkazdi. Best tirik qoldi, biroq unga alkogol taqiqlandi. Jorj buni qabul qildi va ahvolini yaxshilash uchun psixologga bordi. Operatsiyadan keyingi birinchi yilda tinch va yaxshi hayot kechirdi, ammo keyingi ikki yil dahshatli o‘tdi. U qilayotgan ishi yomon ekanini va dahshatli tugashini tushundi, lekin ichishda va janjal chiqarishda davom etdi. Oqibatda 2005-yilda kasalxonaga yotqizildi. Uning jigari yana ishlamay qolgandi. Doktorlar Bestni saqlab qolishning imkoni yo‘qligini aytdi va sobiq futbolchi buni qabul qildi. U taxminan bir hafta yashadi va kundan-kunga ahvoli yomonlashdi.
Hayotining so‘nggi kunida uning oldiga jurnalistlar keldi. Ko‘pchilik OAV vakillarini haydab yuborgan bo‘lardi, lekin Jorj unday qilmadi. Muxbirlarni ko‘rib chin dildan xursand bo‘ldi va barcha savollarga javob berdi. Gazetaga bergan intervyusi oxirida “Men kabi o‘lim topmang” degan jumlani aytdi.
Ertasi kuni Jorj Best gazeta birinchi sahifasida chiqdi, lekin uning o‘zi buni ko‘ra olmadi. Chunki sobiq futbolchi erta tongda Londonda vafot etgandi. U endigina 59 yoshga kirgandi.
Tashqaridan qaraganda u baxtli hayot kechirganga o‘xshaydi, biroq Bestning o‘zi bunday hisoblamaydi. O‘sha intervyuda u muntazam tungi klublarga borganidan, xotinini aldaganidan, “Manchester Yunayted”ga qarshi chiqqanidan afsusda ekanini aytdi va uni professional futbolga olib kelgan skautdan tortib, xotini va bolasigacha hammadan kechirim so‘ragandi. Haqiqiy Best hayotning so‘nggi kunida namoyon bo‘lgandi.
Izoh (0)