“Real Madrid” La Liga doirasida “Valensiya”ga mag‘lub bo‘ldi (0:1). O‘yindan keyin bahs natijasi emas, unda “Qirollik klubi” futbolchisi Vinisius Junior bilan bo‘lgan vaziyatlar keng muhokamaga sabab bo‘ldi. Uchrashuv davomida irqchilik ruhidagi haqoratlarga duch kelgan braziliyalik futbolchi yakunda qizil kartochka bilan “siylandi”. “Daryo” quyida ushbu vaziyat haqida batafsil ma‘lumot beradi.
Mavsum oxiriga kelib portlagan Vini
Vinisius Junior mavsum davomida La Liganing deyarli barcha stadionlarida hushtakbozlik va irqchilik ruhidagi haqoratlarga duch keldi. “Mestalya”dagi o‘yinda esa futbolchining asablari dosh bera olmadi. Hammasi o‘yindan oldin boshlandi...
“Valensiya” muxlislari “Real Madrid” avtobusini Vinisiusga yo‘naltirilgan haqoratlar bilan kutib oldi. Haqoratlar o‘yin vaqtida ham davom etdi. Valensiyalik muxlislar hujumchini “ahmoq maymun” deb atadi va unga o‘lim tiladi.
Ikkinchi bo‘lim o‘rtalarida bahsli holatda pauza yuzaga keldi: Vinisius qanotdan raqib jarima maydoniga yorib kirayotgan vaziyatda mezbonlar himoyachisi maydonga uloqtirilgan boshqa to‘pni chiqarib yuborish uchun tepdi, natijada to‘p Vinisiusda bo‘lib turgan to‘pga tegdi va “Real” futbolchisi bu vaziyatda muvozanatni tiklay olmay yiqildi. Hakamlar uzoq muhokamadan keyin jarima zarbasi belgiladi.
Shu vaqtda darvoza orti tribunalarida irqchilik ruhidagi hayqiriqlar yangradi va maydon tomon turli buyumlar uloqtirildi. Vinisius haqorat yog‘dirayotgan muxlislardan birini ko‘rdi va barmoqlari bilan uni ko‘rsatgan holda noroziligini keskin bildirdi. Hakam esa stadion xodimlaridan muxlislarni tinchlantirishni so‘rab murojaat qilishni talab qildi. Shu tariqa o‘yinda 8 daqiqaga yaqin to‘xtalish bo‘ldi.
Uchrashuvning asosiy vaqtiga 10 daqiqa qo‘shib berildi. Qo‘shib berilgan daqiqalarning chorak qismi ham o‘tmasidan maydonda yana keskinlik ro‘y berdi. Jarima zarbasidan yo‘llangan zarbani “Valensiya” darvozaboni Georgiy Mamardashvili qaytardi va burchak zarbasi belgilandi.
“Valensiya” vakili Yunus Musa maydondagi to‘pni Antonio Ryudigerga bermadi, natijada mehmonlar himoyachisi raqibini maydonga yiqitdi va shundan keyin ommaviy janjal boshlandi. Vinisius Musaga keskin e’tiroz bildirdi, vaziyatga Mamardashvili va “Valenisiya”ning boshqa futbolchilari aralashdi, natijada janjal yuzaga keldi.
“Valensiya” hujumchisi Ugo Duro Vinisiusni tomog‘idan bo‘g‘di. Keyinroq Vinisius Duroning yuziga zarba berdi. Hakam VAR aralashuvidan keyin Vinisiusni maydondan chetlatdi, Duro esa jazosiz qoldi.
Hujumchi maydonni tark etish chog‘ida qo‘l harakatlari bilan “Valensiya” Segundaga tushib ketishi kerakligiga ishora qildi. Bu “ko‘rshapalaklar” zaxira o‘rindig‘ida o‘tirganlarga yoqmadi va maydon tashqarisidan ham tortishuv yuzaga keldi.
La Liga surishtiruvni boshladi, “Valensiya” ham bayonot berdi
Avvaliga uchrashuv bosh hakami Rikardo Bengoechea o‘yin bayonnomasida irqchilik haqida hech narsa keltirmagani aytilgan xabarlar tarqaldi. Keyinchalik bunga kompyuterdagi nosozlik sabab bo‘lgani e’lon qilindi va yangi bayonnomaga muxlislar tomonidan Vinisiusga nisbatan “Maymun, maymun!” deya haqoratli so‘zlar aytilgani yozildi.
Ispaniya La Ligasi darhol holat yuzasidan surishtiruv boshlanganini ma’lum qildi. Surishtiruv uchun kerak bo‘ladigan barcha ma’lumotlar to‘planayotgani aytilgandi. Tegishli qo‘mita nafaqat o‘yin vaqtida yuz bergan holatlar, balki uchrashuvdan avval sodir bo‘lgan vaziyat borasida ham surishtiruv o‘tkazadi.
Liga aybdorlar tegishli qoidalar bo‘yicha jazoga tortilishini ma’lum qilgan.
“Valensiya” klubi ham holat yuzasidan bayonot berdi va Vinisius Juniorga qilingan irqchilikni qoraladi. Klub eng qattiq choralar ko‘rilishini ma’lum qildi.
“Valensiya” futboldagi har qanday haqorat va kamsitishlarni qoralaydi. Klub hurmat va sport qadriyatlariga sodiq bo‘lib, stadionlarda jismoniy va og‘zaki zo‘ravonlikka qarshi o‘z pozitsiyasini yana bir bor tasdiqlaydi hamda La Liganing 35-turi doirasida “Real Madrid”ga qarshi o‘yinda yuz bergan voqealardan afsusda ekanini bildiradi. Klub hodisa yuzasidan tekshiruv olib bormoqda va eng qattiq choralarni ko‘radi.
“Bu futbol emas. Bu La Liga”. Vinisius maydonda yig‘lab yubordi va o‘yindan keyin bayonot berdi
Uchrashuv yakunlanganidan keyin Vinisius Junior ijtimoiy tarmoqlarda katta post qoldirdi.
Irqchilar qo‘lga kiritgan mukofot mening chetlatilishim bo‘ldi. Bu futbol emas. Bu La Liga.
Bu birinchi, ikkinchi yoki uchinchi marta emas. Irqchilik La Ligada odatiy holga aylangan. Liga buni normal deb hisoblaydi, federatsiya ham, raqiblar har o‘yinda bundan foydalanadi. Juda afsusdaman. Qachonlardir Ronaldinyo, Ronaldo, Krishtianu va Messiga tegishli bo‘lgan chempionat hozirda irqchilarniki.
Meni kutib olgan va men sevgan xalq dunyoga o‘zini irqchi davlat sifatida ko‘rsatishga rozi bo‘lmoqda. Afsuski, har hafta sodir bo‘ladigan bunday holatdan himoyalana olmayman. Buni qabul qilaman. Kuchliman va irqchilarga qarshi oxirigacha boraman. Uzoqqa borishga to‘g‘ri kelsa ham.
Karlo Anchelotti ham futbolchining yonini oldi.
Futbolni muhokama qilishni xohlaysizmi? Men yo‘q!
Vinisiusdan o‘yinni davom ettirishni xohlaysanmi, deb so‘radim. O‘yindagi yomon atmosfera sababli futbolchini maydondan olish noto‘g‘ri. Futbolchini yomon o‘ynagani uchun zaxiraga olishim kerak, irqchilik uchun emas. Lekin bugun sodir bo‘lgan holatga avval ham duch kelganmiz, biroq bunday ko‘rinishda emas. Buni qabul qilib bo‘lmaydi.
Men nima qilish kerakligini aytadigan odam emasman, lekin bu tarzda futbol o‘ynab bo‘lmaydi. Hozir 2023-yilda irqchilikka yo‘l qo‘yilishi mumkin emas. Yagona chiqish yo‘li — o‘yinni to‘xtatish.
Hakam ma’lum bir protokol borligini aytdi, biroq butun stadion futbolchini “maymun” deb atayotgandi. Yana nima deyishim kerak? Juda ham xafaman, bunday holat men bilan hech qachon sodir bo‘lmagandi. Hech qachon futbolchini maydondan haqoratlar sababli olaman deb o‘ylamagandim. Vinisius shunchaki futbol o‘ynashni xohlayotgan yigit. Bu qiyin vaziyat.
Qolaversa, chorshanba kuni muxlislarimiz Vinisiusning o‘yinini qizil kartochka tufayli ko‘ra olmaydi. Hammamiz Vinini qo‘llab-quvvatlaymiz. U xafa, chunki shunchaki futbol o‘ynashni xohlaydi.
Futbolchilar Vinisiusni ommaviy ravishda qo‘llab-quvvatladi. Lekin hamma ham emas.
Madrid klubi asosiy yulduzlaridan biri doimiy ravishda haqorat qilinishidan charchagan. Marca nashrining yozishicha, “Real” “Mestalya”da sodir bo‘lgan voqeadan keyin Vinisiusni himoya qilish uchun oxirigacha bormoqchi.
Jamoadoshlari ham braziliyalik futbolchini qo‘llab-quvvatladi. “Gol urishni xohlayotganimning yagona sababi seni quchoqlash va uni senga bag‘ishlash”, — dedi Federiko Valverde.
“Agar Vinisius maydonni tark etishga qaror qilsa, men u bilan birga chiqib ketardim. Yetar. O‘yinning 20-daqiqasidanoq uni haqorat qilishni boshlashdi”, — dedi darvozabon Tibo Kurtua.
“Ispaniyada yana bir qayg‘uli kun. Irqchilar g‘alaba qozongan kun. Bu sharmandalik. Irqchilikdan azob chekish va keyin o‘zingni himoya qilganing uchun qizil kartochka olish! Qachongacha bunga chidashimiz kerak? Men sen bilanman, birodar, kurashimiz davom etmoqda”, — dedi Vinisiusning vatandoshi va jamoadoshi Eder Militao.
“Valensiya” futbolchisi Jastin Klyuvert ham braziliyalik futbolchining tarafini oldi. “Menga Vinisius bilan bo‘lgan holat yoqmayapti. Bu futbol emas”.
Dani Sebalyos ham jamoadoshini qo‘llab-quvvatladi, biroq uning Segunda haqidagi harakatlarini ma’qullamadi.
“Bunday davom etishi mumkin emas. Uni Ispaniyaning barcha stadionlarida haqorat qilishadi.
Vinisiusning ishorasini ham oqlab bo‘lmaydi. ‘Valensiya’ muxlislari ko‘proq hurmatga loyiq. Umid qilamanki, ular Vinini kechiradi”.