Nurafshonda MIB tomonidan do‘koni buzilayotgan tadbirkor xodimlar bilan janjallashib, ularga tahdid qildi

Toshkent viloyati Nurafshon shahrida MIB tomonidan do‘koni buzilayotgan tadbirkor xodimlar bilan janjallashib, ularga tahdid qildi. MIB axborot xizmati holat yuzasidan maʼlumot berdi.

Unga ko‘ra, byuroning Nurafshon shahar bo‘limi ish yurituvida fuqarolik ishlari bo‘yicha O‘rta Chirchiq tumanlararo sudining ijro varaqalariga asosan qarzdorlar X.Abduraxmanov, O.Orazbekov, Sh.Raximov, G.Shukurullayeva hamda Ya.Salvarovlarning zimmasiga “To‘ytepa” MFY, Y.Oxunboboyev ko‘chasidagi yer maydonlaridagi noqonuniy qurilgan do‘konlarini o‘z hisobidan buzdirish, va yer maydonini o‘z holiga qaytarish majburiyatini yuklash to‘g‘risidagi ijro hujjatlari mavjud.

Ijro hujjatlari yuzasidan qarzdorlar va do‘konlardan foydalanayotgan fuqarolar bu haqida rasmiy ravishda bir necha bor ogohlantirilganiga qaramasdan noqonuniy qurilmalarni bartaraf qilmagan. Shu sababli ijro hujjatini ijrosini taʼminlash maqsadida majburiy ijro harakatlari
17-may kuni soat 19:00 ga tayinlangan hamda tegishli organlar, tashkilotlar va taraflarga rasmiy ravishda talabnomalar berilgan.

Mazkur ijro hujjati ijrosini taʼminlash maqsadida, ko‘rsatilgan manzilga borilganda, ijro hujjatida taraf bo‘lmagan shaxslar, yaʼni F.Qambarova, T.Raxmanov va Z.Abduraxmanovalar ijro harakatlarini amalga oshirishga to‘sqinlik qilib, qurilmani buzish uchun keltirilgan maxsus texnikani yoqib yuborishi va buziladigan bino ostiga o‘zini tashlashini bildirishgan.

So‘ngra, qarzdorlar va ijro hujjati bo‘yicha taraf bo‘lmagan shaxslarning 10 kunlik muddat ichida ushbu noqonuniy savdo do‘konlarini o‘zlari ixtiyoriy ravishda buzishiga imkoniyat berishni so‘ragan.

Shu sababli, ijro ishi bo‘yicha ushbu shaxslarga 10 kunlik muddat berilgan, agarda ushbu muddatda noqonuniy qurilma buzilmagan taqdirda, majburiy buzish ijro harakatlari olib boriladi.