Namanganda 62-xalqaro gullar festivali boshlandi. Bu haqda “Daryo” muxbiri Azizbek Abduvaliyev xabar bermoqda.
Tadbirni odatdagidek gullar avtokarvoni boshlab berdi.
200 dan ortiq turli rusumdagi va turfa gullarga burkangan avtomobillar o‘z yurishini Namangan xalqaro aeroportidan boshlab, festival bo‘lib o‘tadigan Bobur nomli bog‘ oldida yakunladi.
Gullar avtokarvoni yakunlangandan so‘ng tadbirning tantanali ochilish marosimi bo‘lib o‘tdi.
Dilnoza Kubayeva va Jamshid Umrzoqov olib borgan marosimda Namangan viloyati hokimi Shavkat Abdurazzaqov, Madaniyat va turizm vaziri Ozodbek Nazarbekov, O‘zbekiston xalq artisti Yodgor Saʼdiyev va O‘zbekiston xalq shoiri Mahmud Toir so‘z oldi.
Shundan so‘ng diplomatik korpus vakillari, Qirg‘izistonning O‘sh, Jalolobod, Norin viloyatlari, Tojikistonning So‘g‘d viloyati rahbarlari ishtirokida ramziy lenta qirqildi hamda Bobur nomli bog‘dagi gullar kompozitsiyalari va ko‘rgazmalar bilan tanishuv boshlandi.
Kechki payt “Afsonalar vodiysi” bog‘idagi amfiteatrida festival ochilishiga bag‘ishlangan bayram konserti bo‘lib o‘tdi. Unda Milena Madmusayeva, Alisher Fayz va Ozodbek Nazarbekov o‘z qo‘shiqlarini mehmonlar va mezbonlarga taqdim etdi.
Konsertni bayramona mushakbozlik yakunlab berdi.
Izoh (0)