Prezident topshirig‘i bilan tut bargidan choy ishlab chiqarishga kirishgan buxorolik tadbirkor muammolarga duch kelmoqda. U Oliy suddan yordam so‘radi

Prezident Shavkat Mirziyoyevning 2018-yil Buxoro viloyatiga tashrifi chog‘ida viloyatda tut bargidan choy ishlab chiqarish va uni eksport qilishga doir masala ham ko‘rib chiqilgan va shaxsan davlat rahbari tomonidan bu ishni amalga oshirish bo‘yicha masʼullarga topshiriq berilgan. Prezident topshirig‘ini bajarishga harakat qilayotgan tadbirkor ayni paytda muammolarga duch kelmoqda.

Tadbirkorning Oliy sud raisidan ko‘mak so‘rashicha, unga prezident tashrifidan so‘ng nol balans evaziga berilgan bo‘sh turgan bino ombori, quritish bino hamda inshootlarni qayta qurib, zamonaviy holga keltirgach, sud qarori bilan tortib olinmoqda.

Oliy sud raisi Baxtiyor Islomovning Qarshi shahrida bo‘lib o‘tgan sayyor qabulida maʼlumot berilishicha, “Bukhara Melburry Tea Silk Worm” MCHJga prezident tashrifida aytilgan tut bargidan choy ishlab chiqarish vazifasi topshirilib, buning uchun MCHJ rahbariga bo‘sh turgan ombor, quritish binosi va inshootlar berilib, evaziga 16 milliard so‘mdan ortiq investitsiya kiritilishi, 50 ta yangi ish o‘rni yaratish majburiyati qo‘yilgan.

“Biz 16 milliard so‘m emas, 18 milliard so‘m investitsiya kiritdik. 50 ta emas, 360 ta yangi ish o‘rni yaratdik. Eski binolarni qurib, yangi, zamonaviy binolar qurdik. Nafaqat tut bargidan choy ishlab chiqaruvchi, pilla urug‘i zavodi faoliyatini ham yo‘lga qo‘ydik. Tut bargidan ishlab chiqarilgan choyni Xitoyga, shunga talabi bor mamlakatlarga eksport qila boshladik”, — deydi zavod ish yurituvchisi Alisher Murodov.

Sud masʼullarining Baxtiyor Islomovga maʼlumot berishicha, G‘ijduvon erkin iqtisodiy zonasi direksiyasi davlat unitar korxonasi tadbirkor o‘z majburiyatini bajarmagan degan vaj bilan uni sudga bergan va binoni tortib olgan.

“Biz eski binoni olib, uni buzib tashlab, qayta qurdik. Shunga qaramasdan investitsiya kiritmagansizlar degan bahona bilan bino-inshootlarni tortib olishdi. Natijada 360 nafardan ortiq ishchi ishsiz qoldi. Xitoylik hamkorimiz tomonidan kiritilgan 1 million dollarlik, o‘zimiz kiritgan 18 milliard so‘m investitsiya mablag‘larimiz kuyib ketmoqda. Biz tayyor qilgan imkoniyatni tortib olishdi”, — deydi tadbirkor vakili.

Sayyor sudda Oliy sud raisiga tushuntirish berilishicha, G‘ijduvon erkin iqtisodiy zonasi bu ishlar bitgach, tashkil etilgan bo‘lib, endilikda tayyor imkoniyatga ega joyni tortib olgan.

“Prezidentimiz 2018-yilning 16—17-fevral kunlari viloyatda, xususan G‘ijduvonda ham bo‘lib, eski paxta zavod o‘rnida tut bargidan choy ishlab chiqarish tashabbusini ilgari surgan. Aynan o‘sha masʼuliyat tadbirkorga yuklatilgan. G‘ijduvon erkin iqtisodiy zonasi aslida keyinchalik tashkil etilgan. O‘sha paytda hokimiyat bo‘sh turgan yer va binolarni ‘Bukhara Melburry Tea Silk Worm’ MCHJga beradi. Erkin iqtisodiy zona tashkil etilgach, bular shartnoma qilishadi va shu shartnomaga ko‘ra ishni olib borishadi. Prezidentimiz aytgan topshiriq to‘liq bajarilib, ish o‘rinlari yaratiladi. Tut bargidan ishlab chiqarilgan choy eksporti yo‘lga qo‘yiladi. Qo‘shimchasiga ipak qurti navlarini yaratish zavodi ishga tushiriladi. Tayyor binolar tortib olingach, shuncha pul kuymoqda, 360 dan ortiq ishchi ishsiz qolmoqda”, — deydi Oliy sud raisi qabuliga kirgan murojaatchi vakili.

Sud hujjatlarida taʼkidlanishicha, “Bukhara Melburry Tea Silk Worm” MCHJ bo‘sh turgan ombor, quritish binosi va inshootlar nol balansda, 2 million dollar investitsiya kiritish sharti bilan berilgan bo‘lishiga qaramasdan, tadbirkor o‘z vaqtida investitsiya kiritmagan. Qolaversa, nol balansda berilgan binolarga egalik huquqi bo‘lmasa-da, uni garovga qo‘yib, ipoteka krediti shartnomasini imzolagan. G‘ijduvon erkin iqtisodiy zonasi direksiyasi davlat unitar korxonasi shundan so‘ng sudga daʼvo kiritib, tadbirkor va “O‘zsanoatqurilishbank” ATB Buxoro mintaqaviy filiali bilan tuzilgan 2021-yil 30-iyuldagi shartnomani haqiqiy emas deb topishni so‘ragan. Sud daʼvogar talabini qanoatlantirgan va tut bargidan choy ishlab chiqarib, eksport qilayotgan tadbirkor ishini to‘xtatib, binoni qaytarish haqida qaror qabul qilgan.

Murojaatchilarning aytishicha, tut bargidan choy ishlab chiqarishni yo‘lga qo‘ygan tadbirkor Xitoyga yiliga 5 milliard so‘mlik mahsulot eksportini amalga oshirmoqda.

“Binolarimiz tortib olingach, ishga 1 million dollar investitsiya kiritgan xitoylik tadbirkor ketib qoldi. 360 nafardan ortiq ishchi ishsiz qoldi. Binolarimizni qaytarib berishsa, bugundan boshlab yana ishlab chiqarishni yo‘lga qo‘ymiz. Eksportni amalga oshiramiz”, — deydi murojaatchilar.

Mazkur murojaat Oliy sud raisi Baxtiyor Islomov nazoratiga olinib, qayta ko‘rib chiqiladigan bo‘ldi.

“Daryo” voqealar rivojini kuzatishda davom etadi.