Президент топшириғи билан тут баргидан чой ишлаб чиқаришга киришган бухоролик тадбиркор муаммоларга дуч келмоқда. У Олий суддан ёрдам сўради

Президент Шавкат Мирзиёевнинг 2018 йил Бухоро вилоятига ташрифи чоғида вилоятда тут баргидан чой ишлаб чиқариш ва уни экспорт қилишга доир масала ҳам кўриб чиқилган ва шахсан давлат раҳбари томонидан бу ишни амалга ошириш бўйича масъулларга топшириқ берилган. Президент топшириғини бажаришга ҳаракат қилаётган тадбиркор айни пайтда муаммоларга дуч келмоқда.

Тадбиркорнинг Олий суд раисидан кўмак сўрашича, унга президент ташрифидан сўнг нол баланс эвазига берилган бўш турган бино омбори, қуритиш бино ҳамда иншоотларни қайта қуриб, замонавий ҳолга келтиргач, суд қарори билан тортиб олинмоқда.

Олий суд раиси Бахтиёр Исломовнинг Қарши шаҳрида бўлиб ўтган сайёр қабулида маълумот берилишича, Bukhara Melburry Tea Silk Worm МЧЖга президент ташрифида айтилган тут баргидан чой ишлаб чиқариш вазифаси топширилиб, бунинг учун МЧЖ раҳбарига бўш турган омбор, қуритиш биноси ва иншоотлар берилиб, эвазига 16 миллиард сўмдан ортиқ инвестиция киритилиши, 50 та янги иш ўрни яратиш мажбурияти қўйилган.

“Биз 16 миллиард сўм эмас, 18 миллиард сўм инвестиция киритдик. 50 та эмас, 360 та янги иш ўрни яратдик. Эски биноларни қуриб, янги, замонавий бинолар қурдик. Нафақат тут баргидан чой ишлаб чиқарувчи, пилла уруғи заводи фаолиятини ҳам йўлга қўйдик. Тут баргидан ишлаб чиқарилган чойни Хитойга, шунга талаби бор мамлакатларга экспорт қила бошладик”, — дейди завод иш юритувчиси Алишер Муродов.

Суд масъулларининг Бахтиёр Исломовга маълумот беришича, Ғиждувон эркин иқтисодий зонаси дирексияси давлат унитар корхонаси тадбиркор ўз мажбуриятини бажармаган деган важ билан уни судга берган ва бинони тортиб олган.

“Биз эски бинони олиб, уни бузиб ташлаб, қайта қурдик. Шунга қарамасдан инвестиция киритмагансизлар деган баҳона билан бино-иншоотларни тортиб олишди. Натижада 360 нафардан ортиқ ишчи ишсиз қолди. Хитойлик ҳамкоримиз томонидан киритилган 1 миллион долларлик, ўзимиз киритган 18 миллиард сўм инвестиция маблағларимиз куйиб кетмоқда. Биз тайёр қилган имкониятни тортиб олишди”, — дейди тадбиркор вакили.

Сайёр судда Олий суд раисига тушунтириш берилишича, Ғиждувон эркин иқтисодий зонаси бу ишлар битгач, ташкил этилган бўлиб, эндиликда тайёр имкониятга эга жойни тортиб олган.

“Президентимиз 2018 йилнинг 16—17 февраль кунлари вилоятда, хусусан Ғиждувонда ҳам бўлиб, эски пахта завод ўрнида тут баргидан чой ишлаб чиқариш ташаббусини илгари сурган. Айнан ўша масъулият тадбиркорга юклатилган. Ғиждувон эркин иқтисодий зонаси аслида кейинчалик ташкил этилган. Ўша пайтда ҳокимият бўш турган ер ва биноларни Bukhara Melburry Tea Silk Worm МЧЖга беради. Эркин иқтисодий зона ташкил этилгач, булар шартнома қилишади ва шу шартномага кўра ишни олиб боришади. Президентимиз айтган топшириқ тўлиқ бажарилиб, иш ўринлари яратилади. Тут баргидан ишлаб чиқарилган чой экспорти йўлга қўйилади. Қўшимчасига ипак қурти навларини яратиш заводи ишга туширилади. Тайёр бинолар тортиб олингач, шунча пул куймоқда, 360 дан ортиқ ишчи ишсиз қолмоқда”, — дейди Олий суд раиси қабулига кирган мурожаатчи вакили.

Суд ҳужжатларида таъкидланишича, Bukhara Melburry Tea Silk Worm МЧЖ бўш турган омбор, қуритиш биноси ва иншоотлар нол балансда, 2 миллион доллар инвестиция киритиш шарти билан берилган бўлишига қарамасдан, тадбиркор ўз вақтида инвестиция киритмаган. Қолаверса, нол балансда берилган биноларга эгалик ҳуқуқи бўлмаса-да, уни гаровга қўйиб, ипотека кредити шартномасини имзолаган. Ғиждувон эркин иқтисодий зонаси дирекцияси давлат унитар корхонаси шундан сўнг судга даъво киритиб, тадбиркор ва “Ўзсаноатқурилишбанк” АТБ Бухоро минтақавий филиали билан тузилган 2021 йил 30 июлдаги шартномани ҳақиқий эмас деб топишни сўраган. Суд даъвогар талабини қаноатлантирган ва тут баргидан чой ишлаб чиқариб, экспорт қилаётган тадбиркор ишини тўхтатиб, бинони қайтариш ҳақида қарор қабул қилган.

Мурожаатчиларнинг айтишича, тут баргидан чой ишлаб чиқаришни йўлга қўйган тадбиркор Хитойга йилига 5 миллиард сўмлик маҳсулот экспортини амалга оширмоқда.

“Биноларимиз тортиб олингач, ишга 1 миллион доллар инвестиция киритган хитойлик тадбиркор кетиб қолди. 360 нафардан ортиқ ишчи ишсиз қолди. Биноларимизни қайтариб беришса, бугундан бошлаб яна ишлаб чиқаришни йўлга қўймиз. Экспортни амалга оширамиз”, — дейди мурожаатчилар.

Мазкур мурожаат Олий суд раиси Бахтиёр Исломов назоратига олиниб, қайта кўриб чиқиладиган бўлди.

“Дарё” воқеалар ривожини кузатишда давом этади.