Shavkat Mirziyoyev Buxoroga tashrifi doirasida qorako‘lchilikni rivojlantirish masalasiga alohida e’tibor qaratdi, deb xabar berdi Prezident matbuot xizmati.
Buxoro qorako‘lchilikning asl vatani ekani, mahalliy aholi ilgaridan bunday mahsulotlarni butun dunyoga sotib, katta daromad topganini qayd etdi. Bu sohada yo‘qolib borayotgan naslchilik va tajribani qayta tiklash, cho‘pon va tikuvchi hunarmandlarni qo‘llab-quvvatlash zarurligini ta’kidladi. Qorako‘lchilik bo‘yicha institut va jamg‘arma, Buxoroda zavod tashkil etish yuzasidani topshiriqlar berdi.
Yana bir diqqatga sazovor loyiha – tut bargidan foydali choy ishlab chiqarishga doir.
Mutaxassislarning fikricha, tut bargida kofein va tanin moddasi odatdagi choydan 200 barobar kam. Vitamin va minerallar esa, aksincha, ko‘proq.
O‘zbekiston Prezidenti bu loyihani ma’qullab, bunday choy aholi salomatligi uchun foydaliligi, import o‘rnini bosishi bilan alohida ahamiyatga ega ekanini ta’kidladi.
Buxoroda o‘rmon xo‘jaligi yo‘nalishida ham katta imkoniyatlar mavjud. O‘zbekistonda o‘sadigan shifobaxsh ne’matlar ko‘plab sohalarda keng qo‘llaniladi. Xususan, sistanxe va isiriq o‘simligiga xorijiy farmatsevtika korxonalarida talab yuqori. Birgina sistanxening dorivor xususiyati jenshen o‘simligiga qaraganda besh barobar yuqoriligiga e’tibor qaratildi.
Shavkat Mirziyoyev bunday tabiiy imkoniyatlarni to‘la ishga solish orqali yangi ish o‘rinlari yaratish, eksportni ko‘paytirish bo‘yicha topshiriqlar berdi.
Izoh (0)