Qashqadaryo viloyatining Qarshi shahrida Ichki ishlar mansabdori fuqaro manfaati uchun prokurorga qarshi chiqib, uning noqonuniy talabini bajarishdan bosh tortgani haqida xabar berilgandi. Bosh prokuratura holatga munosabat bildirib, Ichki ishlar mansabdorini soxta obro‘ orttirishga harakat qilishda aybladi.
“A.Jo‘rayev o‘ziga yuklatilgan vazifalarni bajarishdan bo‘yin tovlab, fuqaroga noqonuniy qurilmani ixtiyoriy bartaraf etish haqidagi dalolatnomani topshirish choralarini ko‘rmagan. Soxta obro‘ orttirish maqsadida shahar prokurorining o‘z xizmat vazifalarini lozim darajada bajarishi haqidagi talabiga nisbatan go‘yoki prokuror fuqaro manfaatlariga zid harakat qilayotgani haqida asossiz vajlar keltirish orqali eʼtiroz bildirgan”, — deyiladi Bosh prokuraturaning bu haqdagi rasmiy axborotida.
Qarshi shahar IIB, 4-sonli Ichki ishlar bo‘limi boshlig‘i Asror Jo‘rayev prokurorning telefon orqali berayotgan topshirig‘idan noroziligini bildirar ekan “Ulug‘ ayyom kunlarida o‘tiribsiz, odamlarni bunday qaqshatmang. Yoqib yubordi emas, ustidan quydi. Xudodan qo‘rqing, tuhmat qilmang, bola-chaqa o‘stiryapsiz. Xohlagan kattamga chiqing, men pensiyaga chiqsam chiqamanki, bunday qilmayman. Men xalqimni yaxshi ko‘raman, xalqimni sevaman”, — degandi.
Bosh prokuratura, shuningdek, mazkur holatni keltirib chiqargan vaziyatga ham aniqlik kiritgan.
“Fuqaro B.Xodiyev tegishli hujjatlarsiz, o‘zboshimchalik bilan Qashqadaryo viloyati ko‘p tarmoqli tibbiyot markaziga kirish darvozasi yonida savdo do‘konini qurib olgan bo‘lib, savdo do‘koni tez tibbiy yordam mashinalarining shifoxona hududiga kirib-chiqishiga to‘sqinlik qilgani va fuqarolarning eʼtirozlariga sabab bo‘layotgani uchun qurilmani ixtiyoriy buzib olish to‘g‘risida bir necha marta ogohlantirilgan. Maʼmuriy javobgarlikka tortilgan. Shunga qaramasdan, noqonuniy qurilishni bartaraf etish choralarini ko‘rmagan.
Mazkur holat Qarshi shahar prokurori tomonidan nazoratga olingan bo‘lib, shu yil 13-aprel kuni Qarshi shahar IIO FMB huzuridagi 4-sonli IIB boshlig‘i A.Jo‘rayev mutasaddi idoralar bilan birgalikda B.Xodiyevga noqonuniy qurilmani ixtiyoriy bartaraf etish bo‘yicha ko‘rsatma berish uchun borgan. Shu vaqtda B.Xodiyevning turmush o‘rtog‘i masʼul xodimlarga faol qarshilik ko‘rsatib, ularni xizmat vazifalarini bajarishdan voz kechishga majburlash maqsadida savdo do‘konini buzmasligini bildirib, kiyimlariga benzin sepib, o‘zini o‘zi yoqish bilan qo‘rqitgan”, — deyiladi rasmiylar maʼlumotida.
Qo‘shimcha qilinishicha, Bobur Xodiyev tomonidan o‘zboshimchalik bilan qurilgan noqonuniy bino ixtiyoriy bartaraf etilmagani sababli Kadastr agentligi Qarshi shahar bo‘limi tomonidan sudga kiritilgan daʼvo arizasi fuqarolik ishlari bo‘yicha Qarshi tumanlararo sudining 2023-yil 5-maydagi hal qiluv qarori bilan qanoatlantirilib, javobgarga noqonuniy qurilmani majburiy tartibda buzdirish va yer maydonini foydalanishga yaroqli holatga keltirish majburiyati yuklatilgan.
Izoh (0)