O‘zLiDeP imzo to‘plashga kirishdi

Tadbirkorlar va ishbilarmonlar harakati – O‘zbekiston Liberal-demokratik partiyasi ham saylovoldi chora-tadbirlarini amalga oshirishga ulkan mas’uliyatni his etgan holda yondashmoqda. 

O‘zbekiston Respublikasi Prezidentligiga O‘zLiDePdan ko‘rsatilgan nomzodni qo‘llab-quvvatlash borasida saylovchilar imzosini to‘plash ishlarini uyushqoqlik bilan o‘tkazishga alohida e’tibor qaratilmoqda. 

Unga ko‘ra hududiy partiya tashkilotlari qoshida ishchi guruhlari tashkil etildi, ular saylovchilar imzolarini to‘plash jarayonida faol ishtirok etishmoqda. 

Ta’kidlash joizki, O‘zbekiston Respublikasi Prezidentligiga ko‘rsatilgan nomzodni qo‘llab-quvvatlovchi imzolarni to‘plash va imzo varaqalari to‘g‘ri to‘ldirilganligini tekshirish tartibi Markaziy saylov komissiyasining Nizomi asosida tartibga solinadi.
 

Qoidaga muvofiq, Saylovda ishtirok etishiga ijozat berilgan siyosiy partiya O‘zbekiston Respublikasi Prezidentligiga ko‘rsatilgan nomzodni qo‘llab-quvvatlab, O‘zbekiston Respublikasi jami saylovchilarining umumiy soni kamida bir foizining imzosini to‘plashi kerak. Bunda bitta ma’muriy-hududiy tuzilmada, ya’ni Qoraqalpog‘iston Respublikasi, viloyat, Toshkent shahrida, siyosiy partiya tegishincha imzolar umumiy sonining ko‘pi bilan sakkiz foizini to‘plashi mumkin.

Imzo to‘plash yakunlanganidan so‘ng partiya Siyosiy Kengashi Ijroiya qo‘mitasida hududiy partiya tashkilotlaridan imzo varaqalarini qabul qilish bo‘yicha maxsus ishchi guruhi tuziladi. So‘ngra siyosiy kuchning vakolatli vakili Qoraqalpog‘iston Respublikasi, har bir viloyat va Toshkent shahri bo‘yicha alohida-alohida qilib tikilgan imzo varaqalarini Markaziy saylov komissiyasiga topshiradi. 

Markaziy saylov komissiyasi taqdim etilgan hujjatlarni to‘liq tekshirib chiqadi va ularning qonun talablariga muvofiqligi to‘g‘risida xulosa beradi.

Saylovchilarning imzosini to‘plash partiyaning 14 mingga yaqin boshlang‘ich tashkilotlarida, ish, xizmat, o‘qish, yashash joyida, saylovoldi tadbirlarida, shuningdek tashviqot yuritish va imzo to‘plash qonun bilan taqiqlanmagan boshqa joylarda amalga oshirilmoqda.

Hozirda respublikamizning barcha hududlarida imzo to‘plash jarayoni qizg‘in kechmoqda. 

O‘zLiDeP matbuot ximzmati.