Берлин Пекиндан Хитойнинг Германияда фаолият юритаётган махфий полиция бўлимларини ёпишни талаб қилди, деб ёзмоқда Bloomberg. Германия ҳукумати бундай бўлимлар Хитойга хориждаги хитойликларни “назорат қилиш ва қўрқитиш” учун керак, деб ҳисоблайди.
Бу борада Хитой томони билан музокаралар 2022 йилнинг ноябридан бери давом этмоқда, дейди Германия Ташқи ишлар вазирлиги матбуот котиби Андреа Зассе. Унинг сўзларига кўра, февраль ойида Хитой ҳукумати Германияда ноқонуний полиция бўлимларини ташкил этаётганини рад этган. Бироқ Пекин Германиядаги айрим “хизмат кўрсатиш шохобчалари” ишлаётганини тан олган ва уларни ёпишга ваъда берган.
Шунга қарамай, Ички ишлар вазирлиги матбуот котиби Максимилиан Калл Германияда камида иккита Хитой полицияси бўлими фаолият юритаётганини, уларнинг иши маҳаллий ҳокимият томонидан диққат билан кузатилаётганини айтди. Каллнинг сўзларига кўра, “булар стационар офислар эмас, балки мобил участкалардир”. Полиция вакилининг таъкидлашича, турли мамлакатларда фаолият юритаётган бундай бўлимлар асосан Хитой разведка идоралари билан алоқада бўлади.
“Германия федератив республикаси ХХР билан чет эл полицияси деб аталадиган идоралар иши бўйича икки томонлама шартномани якунлагани йўқ”, — деб тушунтирганди Ички ишлар вазирлиги вакили кузда т-онлине нашрига. Вазирлик қайд этишича, ҳукумат “Хитойнинг Германиядаги дипломатик ваколатхоналари Дипломатик муносабатлар тўғрисидаги Вена конвенция си ва Консуллик алоқалари тўғрисидаги Вена конвенция си доирасида иш олиб боришини таъминлашга ҳаракат қилмоқда”.
Bloomberg иқтибос келтирган Хитой элчихонаси баёнотида айтилишича, “Хитой ҳукумати доимо халқаро ҳуқуқни қўллаб-қувватлаган ва барча мамлакатларнинг суверенитети ва юрисдикциясини ҳурмат қилган”. Дипломатлар бундай позицияни бир неча бор кўрсатганини таъкидлаб, “Германия томони бунга холисона муносабатда бўлишига ва кейинги шубҳаларга ўрин қолдирмаслигига” умид билдирган.
Мадридда жойлашган Safeguard Defenders инсон ҳуқуқлари ташкилоти маълумотларига кўра, Хитой хорижда ўнлаб ноқонуний полиция бўлимларини ташкил қилган. 2022 йилнинг кузида АҚШ Федерал қидирув бюроси (ФҚБ) ходимлари Бруклиндаги Чайна-тоунда рейд ўтказиб, Хитойнинг хориждаги ноқонуний “полиция бўлимлари”ни топганди. Ғарб расмийларининг фикрича, хориждаги хизмат кўрсатиш марказлари деб аталаётган бу бўлимлардан аслида хориждаги Хитой фуқаролари, жумладан диссидентлар устидан жосуслик қилиш учун фойдаланилмоқда. Жумладан, The New York Times газетаси Хитой ҳукуматининг хитойликларни ватанга қайтишга мажбурлашдан иборат “Тулки ови” дастурини тилга олган.
Изоҳ (0)