Ukraina Oliy sudi rahbari Vsevolod Knyazev qariyb uch million dollar pora olayotgan paytda ushlandi. Bu haqda huquq-tartibot organlaridagi manbalarga tayanib, “Ukrainskaya pravda” xabar bermoqda.
Ushbu maʼlumotni Ukraina prezidenti ofisi rahbarining maslahatchisi Sergey Leshchenko ham tasdiqlaydi. Unga ko‘ra, pora miqdori 2,7 million dollarni tashkil qilgan.
Ukraina Milliy korrupsiyaga qarshi byurosi va Korrupsiyaga qarshi ixtisoslashtirilgan prokuraturasi tafsilot keltirmasdan ma’lum qilishicha, ular “Ukraina Oliy sudidagi yirik korrupsiyani, ya’ni Oliy sud rahbariyati va sudyalari tomonidan nomaqbul foyda olish sxemasini” fosh qilgan.
Muassasa faqat divanda yoyib qo‘yilgan dollar kupyuralari suratini e’lon qildi.
“Strana” nashri manbalari Knyazev milliarder va Oliy Radaning sobiq deputati Konstantin Jevagodan pora olganini da’vo qilmoqda. Ukraina hukumati unga qarashli “Moliya va kredit” bankining bankrotligi bo‘yicha tekshiruv o‘tkazmoqda va Fransiyada bo‘lib turgan tadbirkorning ekstraditsiyasini talab qilmoqda.
“Strana” suhbatdoshlarining aytishicha, hozir Ukraina Oliy sudining jami 18 nafar sudyasi tintuv ostida.
Izoh (0)