АҚШ Марказий разведка бошқармаси ўз Telegram каналини очди ва россияликларни муассаса билан маълумот алмашишга чақирувчи видеоролик эълон қилди. Видео Марказий разведка бошқармасининг YouTube, Twitter, Instagram ва Facebook аккаунтларига ҳам жойланди.
“Ушбу видео Тор аноним ахборот тизими ёрдамида Марказий разведка бошқармаси билан боғланиш учун қийин, аммо муҳим қарорга келган хаёлий руслар ҳақида ҳикоя қилади. МРБ Россия ҳақидаги ҳақиқатни билишни истайди, бу ҳақиқатни биладиган ва бизга айта оладиган ишончли одамларни қидирмоқдамиз. Сиз ҳарбий зобитмисиз? Сиз разведка, дипломатия, илм-фан, юқори технологиялар соҳасида ишлайсизми ёки шундай одамларни танийсизми? Сизда иқтисодиёт ёки Россия Федерациясининг юқори раҳбарияти ҳақида маълумот борми? Биз билан боғланинг. Балки атрофингиздагилар ҳақиқатни эшитишни истамаётгандир. Биз истаймиз”, — дейилади ролик тавсифида.
Россиянинг Украинага кенг кўламли босқини “россияликларнинг бизга келиб, АҚШга зарур бўлган маълумотларни тақдим этиши учун тарихий имкониятни яратди”, дейди CNN телеканалига МРБ манбаси. Суҳбатдошнинг сўзларига кўра, Марказий разведка бошқармаси “нозик ҳудудларда ишлаётган ва қимматли маълумотларга эга бўлган” россияликларнинг эндиликда қуйидаги сўзларга қулоқ солишига умид қилмоқда: “Биз сизни тушунамиз, эҳтимол сиз ўйлаганингиздан ҳам яхшироқ тушунамиз”.
2022 йилнинг ноябридаёқ МРБ разведка хизмати бошлиғи Девид Марлоу агентлик Украинадаги урушдан норози россияликлар билан ҳамкорлик қилиш ниятида эканини айтганди.
Россия ТИВ расмий вакили Мария Захарова Марказий разведка бошқармасининг Telegram канали очилишига муносабат билдирар экан, “мурожаат қилганларни кузатиш учун жуда қулай платформа”, деди.
Ҳозирга қадар уч мингга яқин фойдаланувчи АҚШ МРБ Telegram каналига обуна бўлган.
Изоҳ (0)