Moldova parlamenti raisi Igor Grosu respublika Mustaqil Davlatlar Hamdo‘stligi Parlamentlararo assambleyasi tarkibidan chiqishini aytdi. Uning so‘zlariga ko‘ra, MDHga a’zolik Moldovaga mavjud muammolarni – iqtisodiyotdagi, shuningdek, Dnestrbo‘yi mojarosini hal qilishda yordam bermagan.
“Parlament raisi sifatida xalq, partiya vakillari, prezident va hukumat bilan bo‘lgan ko‘plab suhbatlardan so‘ng shuni maʼlum qilamanki, biz MDH Parlamentlararo assambleyasi aʼzoligidan chiqishga qaror qildik. Bu birinchi qadam, biz hukumat va parlament darajasida boshqa qadamlarni ham ko‘rib chiqyapmiz”, — dedi Grosu brifingda.
Uning qo‘shimcha qilishicha, parlament doimiy byurosining navbatdagi yig‘ilishida u Moldovaning MDH Parlamentlararo assambleyasiga qo‘shilishi haqidagi kelishuvni bekor qilishni bosh vazir Dorin Rechanga rasman taklif qiladi. Shundan so‘ng tegishli tashabbus parlamentda ma’qullanishi rejalashtirilgan.
MDH Parlamentlararo assambleyasi 1992-yildan buyon faoliyat yuritib kelayotgan Mustaqil Davlatlar Hamdo‘stligi ittifoqining davlatlararo organi hisoblanadi. Organ ishtirokchi davlatlarning parlament delegatsiyalaridan iborat. Delegatsiya vakillari milliy parlamentlar tomonidan tayinlanadi yoki saylanadi.
Moldova hukumati 2022-yilda, Rossiyaning Ukrainadagi bosqini boshlanganidan ko‘p o‘tmay, MDH tarkibidan chiqish niyatini e’lon qilgandi. Kishinyov amalda MDHning Davlat rahbarlari kengashi, hukumat rahbarlari kengashi va tashqi ishlar vazirlari kengashi kabi muhim organlaridagi faoliyatini to‘xtatgan. Aprel oyi oxirida Moldova hukumati MDH bilan ko‘plab kelishuvlarni bekor qilayotganini bildirdi.
Izoh (0)