Fransiya Ukrainaga o‘nlab zirhli texnika va yengil tanklar, jumladan, AMX-10RC tanklarini yetkazib berishni va’da qilmoqda. Bu haqda Fransiya va Ukraina prezidentlari Emmanuel Makron va Vladimir Zelenskiyning uchrashuvi yakunlari bo‘yicha qo‘shma deklaratsiyada ma’lum qilindi.
Ukraina prezidenti saytida e’lon qilingan hujjatga ko‘ra, Fransiya Ukrainaning havo hujumidan mudofaa tizimini qo‘llab-quvvatlash hamda Yevropa Ittifoqi va NATOdagi hamkorlari bilan birgalikda ukrainalik harbiylarni o‘qitish niyatini ham bildirgan.
Fransiya Ukrainaga faqat harbiy yordam bilan cheklanmaydi, deyiladi deklaratsiyada. Jumladan, Ukrainaga DNK tahlili uchun ikkita mobil laboratoriya ko‘chirib kelingan, bu urush jinoyatlarini tergov qilishda yordam beradi. Kelgusida bunday yordam ko‘lami yanada ortadi, deb qayd etilgan hujjatda.
Vladimir Zelenskiy 14-may kuni Fransiyaga tashrif buyurdi. U Parijdan avval Berlinga borib, u yerda Germaniya prezidenti va kansleri bilan muzokaralar o‘tkazgan. Zelenskiyning tashrifi oldidan Germaniya hukumati Ukrainaga qariyb uch milliard yevro miqdoridagi eng yirik harbiy yordam paketini e’lon qildi. Parijdan keyin Zelenskiy Londonga yo‘l oldi.
Izoh (0)