Ozarbayjon prezidenti Ilhom Aliyev va Armaniston bosh vaziri Nikol Pashinyan 14-may kuni Yevropa Ittifoqi tashabbusi bilan Bryusselda muzokara o‘tkazdi. Yevropa Kengashi raisi Sharl Mishel matbuotga uchrashuv natijalarini sharhlar ekan, ikki davlat rahbari Armaniston—Ozarbayjon mojarosini hal qilishning bir qancha muhim jihatlari bo‘yicha muvaffaqiyatga erishganini aytdi. Shu bilan birga Pashinyan ham, Aliyev ham Bryusseldagi muzokaralar natijasiga hozircha izoh berishmagan.
Mishelning so‘zlariga ko‘ra, ikkala siyosatchi ham “1991-yildagi Olmaota deklaratsiyasiga so‘zsiz sodiqliklarini” hamda SSSR parchalanishi chog‘ida Armaniston va Ozarbayjonning o‘z chegaralaridagi hududiy yaxlitligini tasdiqlagan. Gap asosan etnik armanlar istiqomat qiladigan Tog‘li Qorabog‘ning Ozarbayjon hududi sifatida tan olinishi haqida ketmoqda. Chegaralarning yakuniy demarkatsiyasi va demilitarizatsiyasi tomonlar o‘rtasidagi muzokaralar mavzusi bo‘ladi, dedi Yevropa kengashi rahbari.
Sharl Mishelning aytishicha, oldinga siljigan yana bir masala “mintaqadagi transport va iqtisodiy aloqalarni blokdan chiqarish” bo‘ldi. Xususan, gap Ozarbayjonning asosiy hududi va uning eksklavi – Naxichevan muxtor respublikasi o‘rtasidagi transport yo‘lagi haqida bormoqda. Boku bunday yo‘lakni Armaniston hududi orqali o‘tkazmoqchi. Ammo Yerevan u mamlakat janubini qolgan qismidan uzib qo‘yishi, bundan tashqari, Armanistonni Eronga to‘g‘ridan to‘g‘ri bog‘lovchi yo‘ldan mahrum qilishi mumkinligidan xavotirda.
Sharl Mishel asirlarni o‘zaro ozod qilish bo‘yicha “yaqin haftalar ichida” bo‘lib o‘tishi kerak bo‘lgan muzokaralarda ham muvaffaqiyatga erishilganini aytdi. “Biz bedarak yo‘qolganlar taqdiriga oydinlik kiritish va minalardan tozalash ishlarini faollashtirish muhimligini ham muhokama qildik”, — deya qo‘shimcha qildi yevropalik rasmiy.
Izoh (0)