Молдова парламенти раиси Игорь Гросу республика Мустақил Давлатлар Ҳамдўстлиги Парламентлараро ассамблеяси таркибидан чиқишини айтди. Унинг сўзларига кўра, МДHга аъзолик Молдовага мавжуд муаммоларни – иқтисодиётдаги, шунингдек, Днестрбўйи можаросини ҳал қилишда ёрдам бермаган.
“Парламент раиси сифатида халқ, партия вакиллари, президент ва ҳукумат билан бўлган кўплаб суҳбатлардан сўнг шуни маълум қиламанки, биз МДҲ Парламентлараро ассамблеяси аъзолигидан чиқишга қарор қилдик. Бу биринчи қадам, биз ҳукумат ва парламент даражасида бошқа қадамларни ҳам кўриб чиқяпмиз”, — деди Гросу брифингда.
Унинг қўшимча қилишича, парламент доимий бюросининг навбатдаги йиғилишида у Молдованинг МДҲ Парламентлараро ассамблеясига қўшилиши ҳақидаги келишувни бекор қилишни бош вазир Дорин Речанга расман таклиф қилади. Шундан сўнг тегишли ташаббус парламентда маъқулланиши режалаштирилган.
МДҲ Парламентлараро ассамблеяси 1992 йилдан буён фаолият юритиб келаётган Мустақил Давлатлар Ҳамдўстлиги иттифоқининг давлатлараро органи ҳисобланади. Орган иштирокчи давлатларнинг парламент делегацияларидан иборат. Делегация вакиллари миллий парламентлар томонидан тайинланади ёки сайланади.
Молдова ҳукумати 2022 йилда, Россиянинг Украинадаги босқини бошланганидан кўп ўтмай, МДҲ таркибидан чиқиш ниятини эълон қилганди. Кишинёв амалда МДҲнинг Давлат раҳбарлари кенгаши, ҳукумат раҳбарлари кенгаши ва ташқи ишлар вазирлари кенгаши каби муҳим органларидаги фаолиятини тўхтатган. Апрель ойи охирида Молдова ҳукумати МДҲ билан кўплаб келишувларни бекор қилаётганини билдирди.
Изоҳ (0)