O‘zbekiston va Qirg‘iziston hamkorligida yangi avtomobil zavodi qurilishi boshlangani haqida xabar berilgan edi. Bishkekdan 50 kilometr uzoqlikdagi Oqsuv qishlog‘ida qad rostlaydigan “Altin tulpar una kurulush” nomli zavod rekord muddatda — 180 kun ichida qurib bitkazilishi rejalashtirilgan.
11-may kuni Qirg‘iziston bosh vaziri Aqilbek Japarov ushbu zavod qurilishi poydevoriga kapsula qo‘ygandi.
“Bugun Qirg‘iziston va O‘zbekiston o‘rtasidagi do‘stlik yangi bosqichga ko‘tarildi. O‘zaro tashriflar amalga oshirilib, bu mamlakatlarimiz o‘rtasidagi ko‘p qirrali hamkorlikni mustahkamlash va kengaytirishga oid kelishuvlar bilan tasdiqlanmoqda. Bugungi kunda yengil avtomobillarni yig‘ish va ishlab chiqarish zavodini qurish uchun kapsulaning qo‘yilishi ham buning isbotidir. Bu har ikki davlat uchun strategik ahamiyatga ega loyiha”, — degan edi bosh vazir.
Ikki davlat hamkorligida qo‘shma avtomobil zavodi ishga tushirilishi bo‘yicha Shavkat Mirziyoyevning yanvar oyida Qirg‘izistonga amalga oshirgan davlat tashrifi davomida kelishuvga erishilgandi.
Tomonlar o‘rtasida imzolangan shartnomalarga ko‘ra, dastlabki bosqichda 3 yil ichida 10 ming, ikkinchi bosqichda 20 ming, uchinchi bosqichda 30 ming dona avtomobil ishlab chiqarish rejalashtirilgan. Zavodda ikki ming ishchi o‘rni yaratiladi.
2022-yilning oktabrida uchrashuv o‘tkazgan O‘zbekiston bosh vaziri o‘rinbosari — investitsiyalar va tashqi savdo vaziri Jamshid Xo‘jayev va Qirg‘izistonning O‘zbekistondagi elchisi Muso Jamanbayev qishloq xo‘jaligi texnikasi va yengil avtomobillar ishlab chiqarishni tashkil etish to‘g‘risidagi bitimni ishlab chiqish bo‘yicha kelishuvga erishgandi.
O‘zbekiston—Qirg‘iziston taraqqiyot jamg‘armasi boshqaruvi raisi Aziz Aaliyev 14-mart kuni “Birinchi radio” efirida birinchi bosqichda zavodga avtomobil yig‘ish uchun butlovchi qismlar yetkazib berilishini bildirgan. “Bu shinalar, charm mahsulotlari, faralar, avto simlar, furnituralar ishlab chiqarishdir. Yangi ish o‘rinlari iqtisodiy o‘sishni ta’minlaydi, avtomobil sanoati zarur qismlarga ega bo‘ladi”, — deb qayd etgan u.
Qirg‘iziston iqtisodiyot va savdo vaziri o‘rinbosari Aynura Usenbekovaning so‘zlariga ko‘ra, zavod 19 modeldagi avtomobillar, jumladan, mikroavtobuslar, pikaplar va sedanlar ishlab chiqaradi. Korxonada Chevrolet, Daewoo va Isuzu rusumli avtomashinalar ishlab chiqarish o‘zlashtiriladi. Konveyerdan birinchi chiqadigan mashina Cobalt bo‘ladi.
“DT Technik” kompaniyasi direktori Farxodjon Do‘smatovning ta’kidlashicha, zavodda dastlabki bosqichda Chevrolet va Isuzu tijorat avtomobillari ishlab chiqariladi.
Yengil avtomobillar narxi —13 ming dollardan, yuk mashinalari — 28 ming dollardan boshlanadi.
Qirg‘izistonlik ekspert, siyosiy fanlar nomzodi Alina Moldokeyeva O‘zbekiston va Qirg‘iziston hamkorligidagi avtomobil zavodi bo‘yicha “Daryo”ga o‘z fikrlarini bildirdi: “Qirg‘iziston—O‘zbekiston avtomobil zavodi qurilishi O‘zbekiston prezidenti Shavkat Mirziyoyev tomonidan 2023-yil yanvarida imzolangan kelishuv tasdig‘idir. Uni amalga oshirish 2023-yilning yoziga mo‘ljallangandi. Avtomobil zavodi rekord muddatda — 180 kun ichida qurilishi rejalashtirilgan. Loyihani ma’lum ish hajmi bilan bir necha bosqichda tashkil etish rejalashtirilgan”.
Uning ta’kidlashicha, Qirg‘iziston uchun loyiha har qanday holatda ham manfaatlidir. Bu iqtisodiy o'sish, barqarorlik, ishsizlik kamayishini anglatadi. Ekologiya bilan bog‘liq muammo ham hal etiladi. Avtomobillar yangi Yevropa standartlari asosida ishlab chiqariladi va havoni ifloslantirmaydi.
Alina Moldokeyeva kelishuvda ko‘zda tutilgan preferensiyalar haqida ham to‘xtalib o‘tdi:
- yengil avtomobillar ishlab chiqarish uchun butlovchi buyumlar va avtomobillarning o‘zi QQS va bojxona to‘lovlaridan ozod qilish;
- avtomobil xaridorlarini birlamchi ro‘yxatga olishdan ozod qilish;
- ishlab chiqarilayotgan avtomobillar davlat xaridlari imtiyozlar yaratish;
- ishlab chiqarilgan avtomobillarga avtokreditlar uchun mablag‘ ajratish;
- avtotransport ishlab chiqarilgandan keyin ikkinchi yil uchun utilizatsiya yig‘imi joriy etish;
- import qilinadigan avtomobillarni ro‘yxatdan o‘tkazish to‘lovini 2023-yil 1-yanvardan oshirish.
“O‘zbekiston va Qirg‘iziston tomonidan shartnomalar imzolangan. Avtomobilsozlikdan tashqari, iqtisodiyotning 30 ta turdosh tarmoqlari (charm o‘rindiqlar, qoplamalar va avtomobillar uchun tegishli detallar ishlab chiqarish) jalb etiladi. Bu ham Qirg‘iziston Respublikasining iqtisodiy salohiyatini oshirishga olib keladi”, — deya qo‘shimcha qilgan ekspert.
Izoh (0)