O‘zbekiston va Qirg‘iziston yangi avtmobil zavodini qurishni boshladi. Birinchi bosqichda u yerda yiliga 10 ming dona avtomobil ishlab chiqariladi. Bu haqda Qirg‘iziston Vazirlar Mahkamasi axborot xizmati xabar berdi.
“Altin tulpar una kurulush” nomli zavod Chuy viloyatining “Ak-Suu” qishlog‘i hududida qad rostlaydi. Bu yerda mingdan ortiq yangi ish o‘rinlari yaratiladi.
“Bugun Qirg‘iziston va O‘zbekiston o‘rtasidagi do‘stlik yangi bosqichga ko‘tarildi. O‘zaro tashriflar amalga oshirilib, bu mamlakatlarimiz o‘rtasidagi ko‘p qirrali hamkorlikni mustahkamlash va kengaytirishga oid kelishuvlar bilan tasdiqlanmoqda. Bugungi kunda yengil avtomobillarni yig‘ish va ishlab chiqarish zavodini qurish uchun kapsulaning qo‘yilishi ham buning isbotidir. Bu har ikki davlat uchun strategik ahamiyatga ega loyiha”, — deydi Qirg‘iziston bosh vaziri Aqilbek Japarov.
Shavkat Mirziyoyev yanvar oyida Qirg‘izistonga amalga oshirgan davlat tashrifi yakunida ikki mamlakat yetakchilari hamda hukumat vakillari o‘rtasida qator hujjatlar imzolangandi. Ular orasida “O‘zbekiston Respublikasi bilan Qirg‘iziston Respublikasi Vazirlar Mahkamasi o‘rtasida Qirg‘iziston Respublikasida avtomobil va tijorat texnikasi ishlab chiqarishni yo‘lga qo‘yish bo‘yicha hamkorlik to‘g‘risida bitim” ham mavjud bo‘lgan.
Iqtisodiyot va savdo vaziri o‘rinbosari Aynura Usenbekovaga ko‘ra, zavodda 19 ta modelni ishlab chiqarishga ruxsat berilgan va birinchi ishlab chiqariladigan mashina Cobalt bo‘ladi.
Izoh (0)