Ўзбекистон ва Қирғизистон ҳамкорлигида янги автомобиль заводи қурилиши бошлангани ҳақида хабар берилган эди. Бишкекдан 50 километр узоқликдаги Оқсув қишлоғида қад ростлайдиган “Алтин тулпар уна курулуш” номли завод рекорд муддатда — 180 кун ичида қуриб битказилиши режалаштирилган.
11 май куни Қирғизистон бош вазири Ақилбек Жапаров ушбу завод қурилиши пойдеворига капсула қўйганди.
“Бугун Қирғизистон ва Ўзбекистон ўртасидаги дўстлик янги босқичга кўтарилди. Ўзаро ташрифлар амалга оширилиб, бу мамлакатларимиз ўртасидаги кўп қиррали ҳамкорликни мустаҳкамлаш ва кенгайтиришга оид келишувлар билан тасдиқланмоқда. Бугунги кунда енгил автомобилларни йиғиш ва ишлаб чиқариш заводини қуриш учун капсуланинг қўйилиши ҳам бунинг исботидир. Бу ҳар икки давлат учун стратегик аҳамиятга эга лойиҳа”, — деган эди бош вазир.
Икки давлат ҳамкорлигида қўшма автомобиль заводи ишга туширилиши бўйича Шавкат Мирзиёевнинг январь ойида Қирғизистонга амалга оширган давлат ташрифи давомида келишувга эришилганди.
Томонлар ўртасида имзоланган шартномаларга кўра, дастлабки босқичда 3 йил ичида 10 минг, иккинчи босқичда 20 минг, учинчи босқичда 30 минг дона автомобиль ишлаб чиқариш режалаштирилган. Заводда икки минг ишчи ўрни яратилади.
2022 йилнинг октябрида учрашув ўтказган Ўзбекистон бош вазири ўринбосари — инвестициялар ва ташқи савдо вазири Жамшид Хўжаев ва Қирғизистоннинг Ўзбекистондаги элчиси Мусо Жаманбаев қишлоқ хўжалиги техникаси ва енгил автомобиллар ишлаб чиқаришни ташкил этиш тўғрисидаги битимни ишлаб чиқиш бўйича келишувга эришганди.
Ўзбекистон—Қирғизистон тараққиёт жамғармаси бошқаруви раиси Азиз Аалиев 14 март куни “Биринчи радио” эфирида биринчи босқичда заводга автомобиль йиғиш учун бутловчи қисмлар етказиб берилишини билдирган. “Бу шиналар, чарм маҳсулотлари, фаралар, авто симлар, фурнитуралар ишлаб чиқаришдир. Янги иш ўринлари иқтисодий ўсишни таъминлайди, автомобиль саноати зарур қисмларга эга бўлади”, — деб қайд этган у.
Қирғизистон иқтисодиёт ва савдо вазири ўринбосари Айнура Усенбекованинг сўзларига кўра, завод 19 моделдаги автомобиллар, жумладан, микроавтобуслар, пикаплар ва седанлар ишлаб чиқаради. Корхонада Chevrolet, Daewoo ва Isuzu русумли автомашиналар ишлаб чиқариш ўзлаштирилади. Конвеердан биринчи чиқадиган машина Cobalt бўлади.
“DT Technik” компанияси директори Фарходжон Дўсматовнинг таъкидлашича, заводда дастлабки босқичда Chevrolet ва Isuzu тижорат автомобиллари ишлаб чиқарилади.
Енгил автомобиллар нархи —13 минг доллардан, юк машиналари — 28 минг доллардан бошланади.
Қирғизистонлик эксперт, сиёсий фанлар номзоди Алина Молдокеева Ўзбекистон ва Қирғизистон ҳамкорлигидаги автомобиль заводи бўйича “Дарё”га ўз фикрларини билдирди: “Қирғизистон—Ўзбекистон автомобиль заводи қурилиши Ўзбекистон президенти Шавкат Мирзиёев томонидан 2023 йил январида имзоланган келишув тасдиғидир. Уни амалга ошириш 2023 йилнинг ёзига мўлжалланганди. Автомобиль заводи рекорд муддатда — 180 кун ичида қурилиши режалаштирилган. Лойиҳани маълум иш ҳажми билан бир неча босқичда ташкил этиш режалаштирилган”.
Унинг таъкидлашича, Қирғизистон учун лойиҳа ҳар қандай ҳолатда ҳам манфаатлидир. Бу иқтисодий ўсиш, барқарорлик, ишсизлик камайишини англатади. Экология билан боғлиқ муаммо ҳам ҳал этилади. Автомобиллар янги Европа стандартлари асосида ишлаб чиқарилади ва ҳавони ифлослантирмайди.
Алина Молдокеева келишувда кўзда тутилган преференсиялар ҳақида ҳам тўхталиб ўтди:
- енгил автомобиллар ишлаб чиқариш учун бутловчи буюмлар ва автомобилларнинг ўзи ҚҚС ва божхона тўловларидан озод қилиш;
- автомобиль харидорларини бирламчи рўйхатга олишдан озод қилиш;
- ишлаб чиқарилаётган автомобиллар давлат харидлари имтиёзлар яратиш;
- ишлаб чиқарилган автомобилларга автокредитлар учун маблағ ажратиш;
- автотранспорт ишлаб чиқарилгандан кейин иккинчи йил учун утилизация йиғими жорий этиш;
- импорт қилинадиган автомобилларни рўйхатдан ўтказиш тўловини 2023 йил 1 январдан ошириш.
“Ўзбекистон ва Қирғизистон томонидан шартномалар имзоланган. Автомобилсозликдан ташқари, иқтисодиётнинг 30 та турдош тармоқлари (чарм ўриндиқлар, қопламалар ва автомобиллар учун тегишли деталлар ишлаб чиқариш) жалб этилади. Бу ҳам Қирғизистон Республикасининг иқтисодий салоҳиятини оширишга олиб келади”, — дея қўшимча қилган эксперт.
Изоҳ (0)