Surxondaryoda ichki ishlar xodimi mast erkakning qo‘llarini bog‘lab qo‘ygani bo‘yicha prokuratura tekshiruv boshladi

Surxondaryo viloyati Muzrabot tumanida 7-may kuni ichki ishlar xodimi unga qarshilik ko‘rsatgan mast erkakning qo‘llarini bog‘lab qo‘ygani to‘g‘risida xabar berilgandi. Viloyat prokuraturasiga ko‘ra, hozirda holat bo‘yicha tekshiruv harakatlari olib borilmoqda.

Aniqlanishicha, 6-may kuni Surxondaryo viloyati Muzrabot tumani, “Shaffof” mahallasida yashovchi S.J. tuman IIBga murojaat qilib, shu kuni tumanning “Yangi hayot” mahallasida yashovchi fuqaro U.P. mast holda yashash uyiga kelib, tinchligini buzayotgani haqida bergan xabariga asosan profilaktika inspektori borgan vaqtda U.P. voqea joyidan qochib ketgan.

So‘ngra, profilaktika inspektori uni topib, tuman Tibbiyot birlashmasidagi vaqtinchalik mastlik holatida bo‘lgan shaxslarga tibbiy yordam ko‘rsatish punktiga olib borib joylashtirgan.

“Mazkur holat yuzasidan tuman prokuraturasi tomonidan tergovga qadar tekshiruv harakatlari olib borilmoqda. Natijasi bo‘yicha manfaatdor shaxslarga tergov organi tomonidan qo‘shimcha ravishda maʼlum qilinadi”, — deyiladi munosabatda.

Surxondaryo viloyati IIB bergan ma’lumotlarga ko‘ra, fuqaro U.P. tibbiyot birlashmasida davolanayotgan bemorlarning tinchligini buzib, qonuniy talablarga bo‘ysunmasdan, qo‘pol so‘zlar bilan haqoratlashda davom etgani sabab uni tinchlantirish maqsadida IIB xodimi qat’iy harakat qilib, qo‘llarini bog‘lab qo‘ygan.