Surxondaryo viloyati Muzrabot tumanida 7-may kuni ichki ishlar xodimi unga qarshilik ko‘rsatgan mast erkakning qo‘llarini bog‘lab qo‘ydi. Viloyat IIB holat yuzasidan munosabat bildirdi.
Ma’lum bo‘lishicha, soat 01:10 da “Shaffof” mahallasida yashovchi fuqaro S.S. ismli ayol tuman IIB navbatchilik qismiga qo‘ng‘iroq qilib, yashash uyiga notanish shaxs kelib ko‘p marta eshigini tepib janjal qilayotgani haqidagi murojaat qilgan.
Shu kuni tungi xizmatga jalb qilingan IIB xodimi M.A. chaqirilgan manzilga borganda fuqaro U.P. kuchli mastlik holatida, xodimning qonuniy talabini bajarmagani uchun uni tibbiyot markazida tashkil etilgan Alkogol mastlik holatidagi shaxslarga tibbiy yordam ko‘rsatish tumanlararo punktiga olib borgan.
Tibbiyot birlashmasida xam davolanayotgan bemorlarning tinchligini buzib, qonuniy talablarga bo‘ysunmasdan, qo‘pol so‘zlar bilan haqoratlashda davom etgan U.P.ni tinchlantirish maqsadida IIB xodimi qat’iy harakat qilib, uning qo‘llarini bog‘lab qo‘ygan. Hozirda mazkur xodimning harakatlari yuzasidan Surxondaryo viloyat IIB mas’ullari tomonidan xizmat tekshiruvi o‘tkazilmoqda.
Izoh (0)