Ozarbayjon Mudofaa vazirligi 10-may kuni kechqurun Armaniston tomonidan o‘q uzilishi oqibatida bir nafar harbiy xizmatchi yaralanganini ma’lum qildi.
Ma’lumotlarga ko‘ra, ozarbayjonlik harbiy xizmatchi Armanistondan uzilgan o‘q oqibatida boshidan yaralangan. Hozirda u harbiy gospitalga yetkazilgan. Mudofaa vazirligining ma’lum qilishicha, 11-may tongida arman harbiylari yirik kalibrli qurol va minomyotlardan yana o‘t ochgan.
14-may kuni Armaniston bosh vaziri Nikol Pashinyan va Ozarbayjon prezidenti Ilhom Aliyev Bryusselda uchrashuv o‘tkazadi. Unda Yevropa kengashi rahbari Sharl Mishel vositachiligida tinchlik bitimi muhokama qilinadi. Shundan keyin Kishinyovda muzokaralarning navbatdagi raundi o‘tkaziladi.
O‘z navbatida Armaniston Mudofaa vazirligi arman askarlari otishma boshlagani, natijada bir ozarboyjonlik askar yaralangani haqidagi xabarlarni dezinformatsiya deb atadi.
May boshlarida Ozarbayjon Tashqi ishlar vazirligi Armaniston bosh vaziri Nikol Pashinyanni tarixdan saboq olmaganlikda ayblagandi. Mazkur bayonotga Pashinyanning Chexiyadagi matbuot anjumanida Ozarbayjonni etnik tozalashda ayblagani sabab bo‘lgan.
Izoh (0)