Ozarbayjon Tashqi ishlar vazirligi Armaniston bosh vaziri Nikol Pashinyanni tarixdan saboq olmaganlikda aybladi. Tegishli bayonot vazirlikning Telegram sahifasida e’lon qilindi.
Mazkur bayonotga Pashinyanning Chexiyadagi matbuot anjumanida Ozarbayjonni etnik tozalashda ayblagani sabab bo‘lgan.
“Bosh vazirning ‘etnik tozalash’ haqidagi bema’ni gaplariga kelsak, tarix davomida ozarbayjonlarni ommaviy qirg‘in qilish, deportatsiya qilish siyosatini tan olish va kechirim so‘rash o‘rniga Ozarbayjonni bunday harakatlarda ayblash tarixdan saboq olmaslik hisoblanadi”, — deyiladi munosabatda.
Bundan tashqari, Boku Yerevanni Ozarbayjonning ichki ishlariga aralashmaslikka chaqirdi, shuningdek, Ozarbayjon—Armaniston chegarasida nazorat-o‘tkazish punkti yaratish, Armaniston bilan chegarada vaziyatni keskinlashtirish va Qorabog‘da gumanitar inqirozni yuzaga keltirish kabi ayblovlarni rad etdi.
“Armaniston tomoni tinchlik shartnomasi bo‘yicha muzokaralar bilan parallel ravishda bunday bayonotlar berayotgani tinchlikka xizmat qilmaydi”, — deya xulosa qilgan Ozarbayjon TIV.
Izoh (0)