Xitoyning yangi mudofaa vaziri Li Shanfuning iyun oyida Singapurda o‘tkaziladigan xavfsizlik sammitida Amerika mudofaa vaziri Lloyd Ostin bilan uchrashish ehtimoli kam, chunki u Rossiyadan “Su-35” qiruvchilari va C-400 zenit raketa tizimlarini xarid qilgani uchun AQSH sanksiyalariga uchragan. Bu haqda Financial Times o‘z manbalariga tayanib xabar berdi.
Vashingtonning ma’lum qilishicha, Li Shanfuga qarshi cheklov choralari Ostin bilan uchrashuviga xalaqit bermaydi. Ammo nashrning bir necha manbalariga ko‘ra, Xitoy hukumati sanksiyalar yechilmagunga qadar ular o‘rtasidagi shaxsiy uchrashuvga rozi bo‘lmaydi. Shu bilan birga, nashr suhbatdoshlari Oq uyning sanksiyalarni bekor qilishga imkoni yo‘qligini ta’kidlagan.
Li Shanfu tayinlovga qadar Sichan kosmodromini boshqargan va Strategik ta’minot kuchlari qo‘mondoni o‘rinbosari lavozimida ishlagan, 2017—2022-yillarda Xitoy Markaziy harbiy kengashi qo‘shinlarini tayyorlash va ta’minlash departamentiga rahbarlik qilgan. 2018-yilda AQSH Moliya vazirligi mazkur department va shaxsan Li Shanfuga qarshi sanksiyalar joriy etgan. Bunga mamlakatning Rossiyadan “Su-35” qiruvchi samolyotlari va C-400 zenit raketa tizimlarini xarid qilgani sabab bo‘lgan.
Li Shangu ikki oy oldin — martda Xitoy mudofaa vaziri lavozimini egalladi. Shu oyda Amerika harbiy idorasi xitoylik hamkasblari bilan aloqalar o‘tgan yil noyabrdan beri uzilganini ma’lum qildi. Bloomberg Tayvan atrofidagi vaziyat va AQSH harbiylarining Xitoy razvedka aerostatlariga zarbalarini bunga sabab qilib ko‘rsatdi.
Aprel oxirlarida AQSH Qozog‘iston Rossiyaga yordam berishi tufayli ikkinchi darajali sanksiyalarga duch kelishi mumkinligidan ogohlantirgandi. Shuningdek, Hindiston AQSH sanksiyalariga tushmagan holda Rossiyadan qurol olish yo‘lini qidirayotgani ma’lum bo‘lgan edi. Bir necha kun oldin esa Yevrokomissiyasi ilk bor Rossiyaga harbiy maqsadlarda ishlatilishi mumkin bo‘lgan uskunalarni yetkazib bergan Xitoyning 7 ta kompaniyasini sanksiyalar ro‘yxatiga kiritdi.
Izoh (0)