AQSH adliya vaziri, bosh prokuror Merrik Garlend ilk bor rossiyalik oligarxning sanksiyalarni buzish oqibatida musodara qilingan aktivlarini Ukrainaga topshirishga ruxsat berdi, deb yozadi Reuters.
Qayd etilishicha, gap rossiyalik tadbirkor Konstantin Malofeyev haqida ketmoqda. 2022-yil aprelda AQSH Adliya vazirligi uni Ukrainada boshlangan urush sabab Rossiyaga qarshi joriy etilgan sanksiyalarni buzishda ayblagan. AQSH hukumatining ma’lumotlariga ko‘ra, Malofeyev Qrimga qarshi separatistik kayfiyatni qo‘llab-quvvatlovchi rossiyaliklarga moliyaviy yordam ko‘rsatgan.
O‘shanda Garlend “Amerika moliyaviy institutlaridan birining hisobraqamida Malofeyev tomonidan buzilgan sanksiyalarga daxldor millionlab aktivlarga muzlatilganini” ma’lum qilgandi. 2023-yil fevralda AQSH bosh prokurori bu pullarni Ukraina ehtiyojlari uchun o‘tkazib berishni ma’qullagan. 10-may kuni esa AQSH Adliya vazirligi ushbu mablag‘larga oid “birinchi transferni” amalga oshirgan.
“Bu Qo‘shma Shtatlar tomonidan musodara qilingan Rossiya mablag‘larini Ukrainani qayta tiklashga ilk bor ajratilishi bo‘lsada, oxirgisi emas”, — deydi Garlend.
Konstantin Malofeyevga qarshi AQSH sanksiyalari
“Sargrad” telekanali asoschisi Konstantin Malofeyev 2014-yildan beri AQSHning sanksiyalari ro‘yxatida. 2022-yil aprelda unga qarshi jarima choralari kengaytirilgan. Xususan, yirik tadbirkor boshqaruvida bo‘lgan “Traskapitalbank” va unga bog‘liq 40 dan ortiq jismoniy va yuridik shaxslar “qora ro‘yxatga” kiritilgan.
Aprel oxirlarida AQSH Qozog‘iston Rossiyaga yordam berishi tufayli ikkinchi darajali sanksiyalarga duch kelishi mumkinligidan ogohlantirgandi. Shuningdek, Hindiston AQSH sanksiyalariga tushmagan holda Rossiyadan qurol olish yo‘lini qidirayotgani ma’lum bo‘lgan edi.
Izoh (0)