AQSH prezidenti Jo Bayden fikricha, Qo'shma Shtatlarda defolt bo‘lsa, dunyoning barcha davlatlarini iqtisodiy muammolar kutmoqda. Uning ta’kidlashicha, bu holatda gap AQSHning jahon iqtisodiyoti uchun katta ahamiyatga ega bo‘lgan ishonchli hamkor sifatidagi obro‘sini saqlab qolish haqida ketmoqda.
“Agar bizda defolt bo‘lsa, butun dunyo muammolarga duch keladi”, — dedi Bayden Nyu-Yorkda davlat qarzi bo‘yicha qilgan chiqishida.
“Ishonchli hamkor sifatida Amerikaning katta mashaqqat bilan qo‘lga kiritgan obro‘sini himoya qilish bo‘yicha ko‘p munozaralar ketmoqda”, — dedi AQSH prezidenti. “Bu nafaqat Amerika iqtisodiyoti uchun, balki butun dunyo uchun ham katta ahamiyatga ega... Hozir retsessiyaga qarab ketadigan, millionlab ish o‘rinlari, Amerikaning jahon sahnasidagi mavqeini xavf ostiga qo‘yadigan vaqt emas”, — dedi Jo Bayden.
AQSH moliya vaziri Janet Yellen 1-may kuni Vakillar palatasi rahbarlariga yo‘llagan maktubida, agar davlat qarzi chegarasi oshirilmasa, G‘aznachilikning mavjud resurslari 1-iyungacha tugashi mumkinligini aytdi. Bunday holda, AQSH joriy yilning yozida davlat qarzi bo‘yicha defoltga duch keladi.
Izoh (0)