Qashqadaryo viloyati Yakkabog‘ tumanida yashovchi ayolning rasmlarini tarqatib yubormaslik uchun pul talab qilgan yigit ushlandi. Bu haqda Kiberxavfsizlik markazi xabar berdi.
Ma’lum qilinishicha, 20 yoshli Sh.A. ariza bilan murojaat qilib, noma’lum shaxs tomonidan qo‘ng‘iroq orqali tahdid qilinib, shaxsiy ma’lumotlarini tarqatmaslik evaziga pul talab qilinayotganini ma’lum qilgan.
O‘tkazilgan tezkor-qidiruv tadbirlari natijasida, tovlamachilik yo‘li bilan Sh.A.ning pullarini o‘zlashtirmoqchi bo‘lgan qonunbuzar Qashqadaryo viloyati Yakkabog‘ tumanida yashovchi 22 yoshli B.H. ekani aniqlangan.
Unga ko‘ra yigit ayolga qo‘ng‘iroq qilib, uning boshqalarga ko‘rsatib bo‘lmaydigan, uyatli foto va videotasvirlari mavjud ekanini va ularni ijtimoiy tarmoqlarda tarqatib yubormaslik uchun 10 million so‘m talab qilgan va B.H. kelishilgan pullarni olayotgan vaqtida jinoyat ustida qo‘lga olingan. Holat yuzasidan Jinoyat kodeksining 165-moddasi 1-qismi bilan ish ochilgan.
Izoh (0)