“Daryo” internet nashrida “Aloqabank” masʼullari mijozi va OAV vakiliga bergan vaʼdasining ustidan chiqmagani, aytilgan muddatda bank xodimi aybi bilan kechikkan Gentra aytomobili o‘rniga vaʼda qilingan mashina olib berilmagani xabar qilingandi. Bank axborot xizmati rahbari Zuhra Yunusovaning tahririyatga bildirishicha, bugun soat 19:00 ga qadar bank masʼullari mijozi tanlagan avtomobilni uning 153 million so‘m puliga pul qo‘shgan holda sotib olgan va fuqaroga yetkazib bergan.
“Daryo” bankdan norozi bo‘lib, tahririyatga murojaat qilgan Bekzod Farmonov bilan ham bog‘lanib, bank tomonidan unga yangi avtomobil sotib olib berilgani to‘g‘risidagi xabarga aniqlik kiritishga urindi.
“Haqiqatan ham bugun aytilgan vaʼda bajarildi. Bank o‘zimning 153 million so‘m mablag‘imga pul qo‘shib, o‘zim xohlagan, yangi Gentra avtomobilini sotib olib berdi. Buning uchun ‘Daryo’ tahririyati jamoasiga, bank rahbariyatiga o‘zimning minnatdorchiligimni izhor qilib, bankka nisbatan hech qanday eʼtirozim yo‘qligini bildiraman”, — deydi Bekzod Farmonov.
Tahririyat bank masʼullari iltimosi va ulardagi tartib-tamoyilni inobatga olgan holda, Gentra avtomobili qanchaga sotib olingani-yu, bank tomonidan mijozning mashina olishi uchun qancha mablag‘ to‘lab berilganini oshkor etmaydi.
Izoh (0)