“Bankirlarga aldandim”. Mashinaga pul to‘lab, ololmayotgan mijoz hasrati

Qashqadaryo viloyatining Qarshi tumanida yashovchi fermer Bekzod Farmonov yaxshi niyat bilan hosilidan orttirgan mablag‘iga yangi mashina xarid qilmoqchi bo‘ladi. Shu maqsadda avtosalonga borib, besh-olti oydan so‘ng chiquvchi qimmat avtomobillardan biriga to‘lov qiladi. Biroq fermer mashina pulini to‘lasa-da, besh-olti oydan so‘ng mashina minish orzusi amalga oshmaydi. Nega deysizmi? Bank xodimining aybi bilan fermer to‘lagan pul avtosalon hisob raqamiga tushmaydi. Fermer bu haqdagi hasratlarini “Daryo” muxbiri bilan suhbati davomida gapirib berdi.

“2022-yilning iyul oyida ‘Aloqabank’ning Qashqadaryo viloyati filiali orqali Gentra avtomobili uchun to‘lovni amalga oshirdim. Bank orqali birinchi plastik kartochkamdan 65 million, ikkinchisidan esa 12 million so‘m pul to‘ladim. Bank xodimi to‘lovlar bo‘lgani haqidagi maʼlumotnomalarni qo‘limga tutqazib, pul so‘ralgan joyga o‘tkazilganini aytdi. Xursand bo‘lib uyga qaytdim. Oradan uch oy o‘tgach, avtosalonga borib, mashinam qachon chiqishini, qolgan 50 foiz to‘lovlarni qachon to‘lashim kerakligi haqida maʼlumot olmoqchi bo‘ldim. Avtosalon xodimlari esa ularga mening hisobimdan hech qanday pul tushmaganini, shartnomaning 7 kunlik muddati o‘tib ketgani bois shartnoma bekor bo‘lganini aytishdi. Bankka kelib, vaziyatga oydinlik kiritsam, bank xodimining aybi bilan men o‘z vaqtida to‘lagan pulim avtosalon hisob raqamiga tushmay, bankda qolib ketgan”, — deydi murojaatchi fermer Bekzod Farmonov.

Yangi mashina minish orzusida yurgan fermerning aytishicha, mazkur muammo yuzaga kelgach, u bank rahbariyatiga shikoyat qilgan.

“Bu muammoni bilganimdan so‘ng bank rahbariga kirdim. Bank boshlig‘i Alisher aka muammo xodimining aybi bilan yuzaga kelganini, muammoni yechish uchun avtosalon rahbari bilan gaplashib, 2022-yilning dekabr oyida menga yangi Gentra avtomobilini olib berishini aytdi. Va o‘zlarining aybi bilan bekor bo‘lgan shartnoma o‘rniga yangi shartnoma tuzishdi. Yangi shartnomada mashinaning salondan chiqish muddati 2023-yil oktabr etib ko‘rsatilayotganini, men o‘z vaqtida pul to‘laganimni, shu sabab 2022-yilning dekabr oyida yangi mashina olishim kerakligini aytdim. Ular shartnoma shunchaki ekanini, menga vaʼda qilingan 2022-yilning dekabr oyida yangi mashina olib chiqib berishlarini aytishdi. Men ularga ishondim va ular aytgandek boshqa shartnoma tuzdim”, — deydi fermer.

Bekzod Farmonovning aytishicha, 2022-yilning dekabr oyida bank rahbari va avtosalon masʼuli uni chaqirib, “mashinangiz zavoddan chiqib, avtosalonga keldi, mana bu mashina sizniki”, deb unga yangi mashina ko‘rsatgan. Ammo ko‘p o‘tmay bu yolg‘on bo‘lib chiqqan.

“Meni chaqirib, mana bu yangi mashina sizniki, arzimas muammosi qoldi deyishgach, men avtomobil to‘lovining qolgan qismini ham to‘lab, mashinaning to‘liq pulini to‘ladim. Lekin 2022-yilning dekabr oyi u yoqda tursin, 2023-yilning fevral oyida ham mashinadan darak yo‘q. Bank rahbariga nega meni aldadingiz desam, avtosalon boshlig‘iga ishongandim, u ham bizni aldadi deyapti. Avtosalon boshlig‘i esa bu haqda gap bo‘lmagan deyapti. Xullas, avtomobil pulini to‘liq to‘lab qo‘ygan bo‘lsam-da, ololmay sarsonman”, — deydi yangi mashina minishga ishtiyoqmand fermer.

“Daryo” mazkur holat yuzasidan “Aloqabank”ning Qashqadaryo viloyati filali masʼuli Alisher Mirzayev bilan ikki marotaba — 2022-yilning sentabr, 2023-yilning fevral oylarida muloqot qildi. Dastlabki muloqotda masʼul haqiqatdan ham bank xodimlarining xatosi sabab muammo yuzaga kelganini, biroq, mijoz bilan kelishganini va aytilgan muddatda muammoni yechishi haqida maʼlum qilgandi. 2023-yilning fevral oyidagi takroriy muloqotda esa muammoni hal etish kechikkanini, buni OAVda yoritib jamoatchilikni bundan boxabar qilish kerakmasligini aytdi. Shuningdek, u fermerga bergan vaʼdasini 2023-yilning 28-fevral kuni bajarishini maʼlum qildi. Ammo fermerning tahririyatga taqdim qilgan audioyozuvida bank boshlig‘i mijoziga muammoni hal etish qo‘lidan kelmaganini, bu haqda bemalol tegishli joylarga, xususan sudga ham murojaat qilishi mumkinligini taʼkidlagan.

Tahririyat bankirlar aybi sabab yuzaga kelgan muammodan AT “Aloqabank”ning respublikadagi masʼullarini ham boxabar qildi. “Daryo” jurnalisti bilan muloqot qilgan bank axborot xizmati rahbari Zuhra Yunusova muammo tez orada o‘rganilishini, xatoga yo‘l qo‘ygan bank masʼullariga tegishli chora ko‘rilishini, shuningdek, bank mijozining muammosi hal etilishini bildirdi.

“Daryo” voqealar rivojini kuzatishda davom etadi.