“Daryo”da Qashqadaryo viloyatining Qarshi tumanida istiqomat qiluvchi fermer Bekzod Farmonov yangi mashina xarid qilish uchun “O‘zavtosanoat”ga “Aloqabank”ning Qashqadaryo filiali orqali pul to‘lagani, ammo mijoz puli bank xodimi aybi bilan o‘z vaqtida ko‘rsatilgan manzilga tushmagani sabab mashinasini ololmayotgani xabar berilgandi. “Aloqabank” mazkur maqolaga munosabat bildirib, kamchilikka yo‘l qo‘yilgani uchun filial rahbariga hayfsan berilganini, xodimlari ogohlantirilganini bildirgandi.
“Daryo”da eʼlon qilingan ikkinchi maqolada esa bankirlar xodimlarini jazolash orqali muammoga yechim topishga uringani, biroq mijoz muammosi ochiqligicha qolgani bayon qilingandi.
“Aloqabank” rahbariyatining “Daryo”ga maʼlumot berishicha, mijoz muammosiga 2 xil usulda yechim topishga urinilmoqda.
“Bu haqda bank mijoziga avvalroq, yaʼni ikkinchi maqola jamoatchilik eʼtiboriga havola qilinishidan avval ham taklif berilgan. Biroq mijoz taklifni rad etgandi. Biz mijoz bilan yuzaga kelgan muammoni hal etish uchun unga ikki xil taklif beryapmiz. Birinchisi salondan avtomobili chiqqunga qadar mijoz foydalanib turishi uchun unga aynan Gentra rusumli avtomobil berishimizni aytdik. Ikkinchi taklif esa, ayni paytda u ikkilamchi bozordan yangi Gentra sotib olsa, qo‘shimcha xarajati bank tomonidan qoplanishini bildirdik”, — deydi bank axborot xizmati rahbari Zuhra Yunusova.
Masʼullarning qo‘shimcha qilishicha, mijoz bu takliflarni rad etgan.
“Daryo” jurnalistining bu haqdagi so‘roviga javob bergan bank mijozi Bekzod Farmonov esa unga avvalroq bunday taklif berilsa-da, ishga masʼuliyat bilan yondashilmaganini aytib, ayni paytda ikkinchi taklifni qabul qilishini aytmoqda.
“Men mashina bozordan yangi avtomobil xarid qilaman. 153 million so‘mdan ortiq xarajatini bank qoplab bersa, roziman”, — deydi Bekzod Farmonov.
Murojaatchining aytishicha, u mazkur taklifni qabul qilish ayni paytda “Aloqabank”ning Qashqadaryo viloyati filialiga yetib borgan.
“Daryo” voqealar rivojini kuzatishda davom etadi.
Izoh (0)