“Daryo” internet nashrida Qashqadaryo viloyatining Qarshi tumanida istiqomat qiluvchi fermer Bekzod Farmonov Gentra rusumli yangi mashina xarid qilish uchun “O‘zavtosanoat”ga “Aloqabank”ning Qashqadaryo filiali orqali pul to‘lagani, ammo mijoz puli bank xodimi aybi bilan o‘z vaqtida ko‘rsatilgan manzilga tushmagani sabab mashinasini ololmagani, dastlabki shartnoma kuygani xabar berilgandi. “Aloqabank” mazkur maqolaga munosabat bildirib, kamchilikka yo‘l qo‘yilgani uchun filial rahbariga hayfsan berilgani, xodimlari ogohlantirilganini bildirdi. Va mijozi huquqining poymol bo‘lmasligi uchun uning muammosiga 2 xil usulda yechim qilmoqchiligini, qay birini tanlasa bank rahbariyati buni bajarishga tayyorligini maʼlum qilgandi.
“Bank ikki xil usul orqali xodimlari yo‘l qo‘ygan xatoni to‘g‘irlamoqchi bo‘lishganini, xohlasam ikkinchi shartnoma muddati 2023-yilning dekabr oyiga qadar minib turish uchun Gentra rusumli mashina berib turishlarini, xohlasam mashina uchun salonga to‘lagan 153 million so‘m pulimga qo‘shimcha qo‘shib, bozordan shu rusumdagi yangi mashinani sotib olib berishlarini aytishgandi. Men kimningdir mashinasini minishni istamaganim uchun ikkinchi yo‘l — ikkilamchi bozordan pulimga pul qo‘shib yangi mashina olib berishlarini tanlagandim. Shu kelishuvga ko‘ra ular avvaliga bir hafta kutib turing pul muammosini hal qilaylik deyishdi. Aytilgan mudat kelgach, yana bir hafta kuting, muammolar yechilsin deyishdi. Ikkinchi aytilgan muddat kelganda ham OAV vakillari orqali yana bir hafta muddat so‘rashib, oy yakun bo‘lsin, oyning oxirida vaʼdamizni bajaramiz deyishdi. Aprel oyi yakuni va mayning dastlabki o‘n kunligida ham pulni naqdlashtirolmayapmiz degan bahona bilan vaʼdasini bajarmadi”, — deydi bankning aldovlaridan to‘yganini aytgan mijoz Bekzod Farmonov.
.jpg)
2023-yilning 7-aprel kuni “Daryo” jurnalisti bilan muloqot qilgan masʼul — bank boshqaruvi raisi o‘rinbosari Hasan Rahmatov mijoz manfaatini himoya qilish uchun bank yordamga tayyorligini, xodimlari yo‘l qo‘ygan xatoni to‘g‘irlash uchun mijoziga 2 ta variant taklif qilib, mijozi istagan vaqtda muammoni hal qilishini bildirgandi. Va tahririyat bankning muammo yechimiga tayyorligini ham bilishlari lozimligini taʼkidlagandi. Shunga ko‘ra “Daryo”da “‘Bozordan mashina sotib olsa xarajati qoplanadi yoki avtomobili chiqqunga qadar foydalanib turish uchun mashina beriladi’. ‘Aloqabank’ ‘Daryo’dagi maqolaga munosabat bildirib, mijozi muammosiga yechim aytdi”, sarlavhali material eʼlon qilingandi.
Bank taklif qilgan ikki variantdan biri mijoz istasa yangi mashinasi salondan chiqqunga qadar unga ijaraga xuddi shu rusumdagi avtomobilni olib berish bo‘lsa, ikkinchisi ikkilamchi bozordan mijozining 153 million so‘m puliga pul qo‘shib yangi mashina xarid qilishiga ko‘maklashishdan iborat edi. Bank mijozi ikkinchi usulni tanlashiga qaramasdan bank vaʼdasini bajarmadi.
“Bu maqsad uchun mablag‘ ajratilgan. Ammo uni naqdlashtirishda muammolar yuzaga kelmoqda. Shu sabab aytilgan muddatda mijoz muammosini hal etolmadik. Bu haqda mijozni ham xabardor qilganmiz”, — deydi bank axborot xizmati rahbari Zuhra Yunusova.
Bankning mas’ullari vaʼdalariga ishonmay qo‘ygan Bekzod Farmonov “‘Aloqabank’ ‘mijoz bank uchun emas, bank mijoz uchun‘, degan tamoyiliga teskari ishlar ekan, bu bankka ishonchim qolmadi”, deydi.
.jpg)
Mazkur maqola saytda eʼlon qilinishi arafasida bank axborot xizmati rahbari Zuhra Yunusova tahririyat jurnalisti bilan bog‘lanib, bankning qashqadaryolik mijozi muammosi bugun, 10-may kuni soat 16:00 ga qadar hal etilishini vaʼda qildi.
“Daryo” voqealar rivojini kuzatishda davom etadi.
Izoh (0)