Bosh prokuratura matbuot xizmati Toshkent viloyati Yangiyo‘l tumanida istiqomat qiluvchi erkak xotinini pichoqlab qo‘yganiga qaramay ochiqda yurganiga oid xabarlarni rad etdi.
“Xabar.uz” so‘roviga javoban holatga oydinlik kiritgan idora matbuot xizmati rahbari Hayot Shamsutdinov Yangiyo‘l tumani istiqomat qiluvchi M.A. (1952-yilda tug‘ilgan) oilaviy kelishmovchilik tufayli 1979-yilda tug‘ilgan xotini D.T.ning badaniga xo‘jalik pichog‘ini bir necha bor sanchib, tan jarohati yetkazganini tasdiqlagan. Biroq holat yuzasidan jinoyat ishi qo‘zg‘atilmagani va erkak ochiqda go‘yoki bemalol yurganiga oid xabarlarni rad etgan.
Unga ko‘ra, 30-aprel kuni kech soat 23:30 chamasida sodir bo‘lgan voqelik yuzasidan ertasigayoq Jinoyat kodeksining 104-moddasi 2-qismi “l” bandi bilan (qurol yoki sovuq qurol sifatida foydalanilishi mumkin bo‘lgan ashyo bilan badanga og‘ir shkast yetkazish) jinoyat ishi qo‘zg‘atilgan. Tergov jarayonida M.A. protsessual tartibda ushlanib, unga nisbatan “uy qamog‘i” ehtiyot chorasi tanlangan. Bunday turdagi ehtiyot chorasi tanlanishi ayblanuvchining 2-guruh nogironi (Afg‘on urushi qatnashchisi) ekani bilan izohlanadi. Ayni paytda dastlab tergov ishlari davom etmoqda.
Pichoqlash bilan yakunlangan oilaviy janjallar
Mart boshlarida Buxoroda er janjal sabab xotinini pichoqlagani, Jizzaxda er rashk sabab avval xotinini keyin esa o‘zini pichoqlab o‘ldirgani, Vobkent tumanida mast fuqaro qaynukasini pichoqlagani to‘g‘risida xabar berilgandi.
Shuningdek, 2022-yilning dekabrida Toshkent viloyatida kelin oilaviy kelishmovchilik oqibatida qaynonasini kamida 20 marotaba pichoqlagan edi. Ushbu holat yuz bergan xonadonda qaynona-kelin chiqisha olmay qolgan. Pichoqlangan qaynonaning aytishicha, 9 oydan beri kelini uning gaplariga kirmay, aytgan ishlarini qilmay kelgan.
Izoh (0)