Бош прокуратура матбуот хизмати Тошкент вилояти Янгийўл туманида истиқомат қилувчи эркак хотинини пичоқлаб қўйганига қарамай очиқда юрганига оид хабарларни рад этди.
“Хabar.uz” сўровига жавобан ҳолатга ойдинлик киритган идора матбуот хизмати раҳбари Ҳаёт Шамсутдинов Янгийўл тумани истиқомат қилувчи М.А. (1952 йилда туғилган) оилавий келишмовчилик туфайли 1979 йилда туғилган хотини Д.Т.нинг баданига хўжалик пичоғини бир неча бор санчиб, тан жароҳати етказганини тасдиқлаган. Бироқ ҳолат юзасидан жиноят иши қўзғатилмагани ва эркак очиқда гўёки бемалол юрганига оид хабарларни рад этган.
Унга кўра, 30 апрель куни кеч соат 23:30 чамасида содир бўлган воқелик юзасидан эртасигаёқ Жиноят кодексининг 104-моддаси 2-қисми “л” банди билан (қурол ёки совуқ қурол сифатида фойдаланилиши мумкин бўлган ашё билан баданга оғир шкаст етказиш) жиноят иши қўзғатилган. Тергов жараёнида М.А. процессуал тартибда ушланиб, унга нисбатан “уй қамоғи” эҳтиёт чораси танланган. Бундай турдаги эҳтиёт чораси танланиши айбланувчининг 2-гуруҳ ногирони (Афғон уруши қатнашчиси) экани билан изоҳланади. Айни пайтда дастлаб тергов ишлари давом этмоқда.
Пичоқлаш билан якунланган оилавий жанжаллар
Март бошларида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.
Шунингдек, 2022 йилнинг декабрида Тошкент вилоятида келин оилавий келишмовчилик оқибатида қайнонасини камида 20 маротаба пичоқлаган эди. Ушбу ҳолат юз берган хонадонда қайнона-келин чиқиша олмай қолган. Пичоқланган қайнонанинг айтишича, 9 ойдан бери келини унинг гапларига кирмай, айтган ишларини қилмай келган.
Изоҳ (0)