Қашқадарё вилоятининг Қарши шаҳрида яшовчи фуқаро “Дарё”га мурожаат қилиб, аукцион савдо орқали салкам 230 миллион сўмга кўп қаватли уйдан хонадон сотиб олганини, аммо қонуний аукцион ғолиби бўлишига қарамасдан уйга эгалик қилолмаётганини айтмоқда.
“Биз қарздорлик эвазига хатланган ва аукцион савдога қўйилган кўп қаватли уйдаги хонадонни аукцион савдода қатнашиб, 229 миллион 545 минг сўмга сотиб олдик ва пулини ўз вақтида тўладик. Лекин уйни олганимдан сўнг, МИБ ходими уйни эгасидан олиб беролмаслигини, боиси аукцион савдо бўлаётган пайтда уй эгаси бошқа бир инсон билан келишиб, уйни сотиб юборганини айтди. Биз савдо бўлаётган пайтда қандай қилиб, уй эгаси ўзбошимчалик билан уйни сотиб юбориши мумкинлигини, савдо давом этаётганда бундай ҳаракатлар тўхтатилиши кераклигини айтдик. Аммо натижа бўлмаяпти. Аукционнинг қонуний ғолиби бўлсам-да, ҳалигача уйни ололмаяпман”, — дейди бу ҳақда таҳририятга мурожаат қилган Ҳусанжон Шамсиев.
Мурожаатчи Ўзбекистон президенти томонидан 2017 йил 27 июль куни имзоланган қарорга кўра, аукцион натижалари ҳақидаги баённома олди-сотди кучига эга бўлиб, мол-мулкни тақиқдан ечиш, уни аукцион ғолибига топшириш, шунингдек, ғолиб номига мулкни, мулк ҳуқуқини ва бошқа мулкий ҳуқуқларни рўйхатдан ўтказиш учун асос ҳисобланишини айтмоқда.
“Шунингдек, Ўзбекистон Республикаси Вазирлар Маҳкамасининг 2022 йил 12 январдаги Қарори билан тасдиқланган низомнинг 46-бандига мувофиқ мазкур баённома олди-сотди шартномаси кучига эга бўлиб, мулк ва мулкий ҳуқуқни давлат рўйхатдан ўтказиш учун асос ҳисобланади-ку”, — дейди у.
Ҳусанжон Шамсиев Қарши шаҳрида мазкур вазият бўйича масъуллар президент ва Вазирлар Маҳкамаси қарорларини тан олмаётганини айтмоқда.
“Фуқароларнинг қонуний манфаатларига беписанд муомалада бўлишаётгани ачинарли. Айрим давлат ташкилоти ходимларининг ҳукумат қарори ижросига бефарқлик ва лоқайдлик қилиши оқибатида биз каби фуқароларнинг муаммолари кўпаймоқда. Юқори ташкилотларга мурожаат қилишимизга сабаб бўлмоқда”, — дейди мурожаатчи.
Аниқланишича, Ҳусанжон Шамсиев 2023 йил 24 март куни онлайн “E-auksion” савдода қатнашиб, лот рақами №4713163 бўлган Қарши шаҳар “Рогузар” маҳалласи Ислом Каримов кўчасида жойлашган 497-уйнинг 7-хонадонини сотиб олган.
“Биздан олдинда турган аукцион ғолиби белгиланган муддатда уй пулларини тўламаганлиги сабабли уйни онлайн аукционда менга таклиф қилишди ва мен пулларни тўлиқ тўладим. Аукцион натижалар тўғрисидаги баённома берилди. Баённомани олиб Қарши шаҳар Мажбурий ижро бюросига борсам, ижро ходими Аббос Ёқубов уйни олиб беролмаслигини айтди. Сабабини сўраганимда уйнинг эгаси аукционда биринчи ғолиб бўлган фуқаро билан ўзаро келишиб уйини сотганини айтди”, — дейди мурожаатчи.
Фуқаронинг айтишича, аукцион савдо ўтаётган пайтда 2023 йилнинг 19 апрель куни уй эгаси уйини яширинча сотиб юборган.
“Уй аукцион савдога қўйилганини банк ва МИБ ходимлари билмасдими? Ёки уйни сотишга қўйилган тақиқни кўчадан келган бошқа инсон ечганми? Банк ва МИБ ходимлари аукцион жараёни кетаётганини била туриб, нима учун ноқонуний иш қилди? Давлатимиз раҳбари ва Вазирлар Маҳкамаси томонидан чиқарилган қарорларни банк ва МИБ тан олмайдими? Ёки қандайдир манфаат турибдими? Президентимизнинг 2019 йил 26 августдаги ПҚ-4427-сонли қарорида ҳам ъаукцион ғолиби айби бўлмаган тақдирда, маъмурий тартиб-таомилларга риоя қилинмаганлиги учун электрон онлайн-аукцион натижалари тўғрисидаги баённомани бекор қилиш ёки ўзгартиришга йўл қўйилмайдиъ, деб белгилаб қўйилган-ку”, — дейди Ҳусанжон Шамсиев.
“Дарё” воқеалар ривожини кузатишда давом этиб, масъуллардан тайинли жавоб кутади.
Изоҳ (1)
Bularni kuchi oddiy fuqarolarga yetadi