Namangan davlat universitetida erkak o‘z xotinini pichoqlab o‘ldirib, o‘zini ham pichoqlagani haqida xabar berilgan edi. “Millar”da mazkur erkakning sog‘lig‘i haqida maʼlumot berildi.
6-may kuni soat 12:00 da To‘raqo‘rg‘on tumanida yashovchi fuqaro Namangan davlat pedagogika instituti binosi oldida oilaviy kelishmovchilik sababli turmush o‘rtog‘i bilan janjallashib, uni pichoqlab, o‘limiga sababchi bo‘lgan tan jarohati yetkazgan.
Bosh prokuratura matbuot xizmati boshlig‘i Hayot Shamsutdinovning yozishicha, erkak 26 yoshda, ayol esa 23 da bo‘lgan. Xotini pichoqlaganidan keyin u o‘ziga bir necha marotaba pichoq bilan jarohat yetkazib, o‘z joniga qasd qilgan. Voqea joyida bo‘lgan fuqarolar tomonidan o‘zini pichoqlagan erkak shifoxonaga hushsiz holatda olib borilgan.
Maʼlum qilinishicha, unda ko‘p qon yo‘qotish holati kuzatilgan. Bemor zudlik bilan operatsiya qilingan va operatsiya muvaffaqiyatli yakunlangan. Biroq hozirda uning ahvoli juda og‘ir ekani qayd etildi.
“26-27 yosh atrofidagi erkak tanasidagi ko‘plab sanchilgan-kesilgan jarohatlari bilan olib kelingan. Bemorning ko‘p miqdorda qon yo‘qotgani aniqlandi. Bo‘yin sohasi va qornining oldingi devorida ko‘plab sanchilgan-kesilgan jarohatlar aniqlandi. Bemorda zudlik bilan operatsiya o‘tkazish lozim, deb topildi. Operatsiya jarayoni muvaffaqiyatli o‘tkazildi. Tanadagi barcha jarohatlari tikilib, hayoti saqlab qolindi. Bemor holati o‘ta og‘ir”, deydi shifokor.
Aniqlanishicha, ushbu jinoyatni sodir etgan shaxs turmush o‘rtog‘i bilan 2022-yilning yanvar oyidan buyon o‘zaro oilaviy janjal sababli ajrashgan. Shundan so‘ng u turmush o‘rtog‘ini o‘zi bilan birga yashashga majbur qilib, asossiz rashk qilib kelgan holda bir necha marotaba janjallashib yurgan.
Viloyat oila va xotin-qizlar boshqarmasi matbuot xizmati ularning bir nafar farzandi borligini maʼlum qildi. Oilada kelishmovchiliklar bo‘lgani sababli ayol ota uyiga ketgan. 2022-yil aprel oyida ushbu oila oilaviy qadriyatlarni mustahkamlash komissiyasi tomonidan yarashtiriladi.
Maʼlum muddatdan so‘ng yana oiladagi nizolar ortib boradi. Juda ko‘p murojaatlaridan so‘ng ikkala mahalla MFY faollari ajrimga xulosa berishga majbur bo‘ladi. Oilani tiklash imkoni bo‘lmagani uchun sudga qilingan murojaatlardan so‘ng sud ajrim uchun 6 oy muhlat bergan va hozirgacha 5 oy o‘tgan.
Mazkur holat yuzasidan Namangan shahar prokuraturasi tomonidan Jinoyat kodeksining 97-moddasi bilan jinoyat ishi qo‘zg‘atilib, gumon qilinuvchi protsessual tartibda ushlangan va hozirda tergov harakatlari olib borilmoqda.
Pichoqlash bilan yakunlangan oilaviy janjallar
Mart boshlarida Buxoroda er janjal sabab xotinini pichoqlagani, Jizzaxda er rashk sabab avval xotinini keyin esa o‘zini pichoqlab o‘ldirgani, Vobkent tumanida mast fuqaro qaynukasini pichoqlagani to‘g‘risida xabar berilgandi.
Shuningdek, 2022-yilning dekabrida Toshkent viloyatida kelin oilaviy kelishmovchilik oqibatida qaynonasini kamida 20 marotaba pichoqlagan edi. Ushbu holat yuz bergan xonadonda qaynona-kelin o‘zaro chiqisha olmay qolgan. Pichoqlangan qaynonaning aytishicha, 9 oydan beri kelini uning gaplariga kirmay, aytgan ishlarini qilmay kelgan.
Izoh (0)