Малайзия Қашқадарёда доривор ўсимликларни қайта ишлаш лойиҳасини амалга оширмоқчи

Малайзия компаниялари Қашқадарё вилоятида доривор ўсимликларни қайта ишлаш лойиҳасини амалга ошириш имкониятини ўрганмоқда. 

Хабарга кўра, Малайзиянинг биологик фаол қўшимчалар дистрибютори — “Essentiq Pharma” компанияси раҳбарияти ва Қашқадарё вилояти Миришкор туман ҳокими Шерали Санаев бошчилигидаги ишбилармон доира вакиллари делегацияси ўртасида учрашув ташкил этилди.

Учрашув аввалида Малайзия томонига Қашқадарё вилояти, шу жумладан Миришкор туманини иқтисодий-ижтимоий ривожлантириш бўйича амалга оширилаётган ишлар, туман ўсиш нуқталари ва драйвер тармоқлари, шунингдек, Ўзбекистонда хорижий инвесторлар учун яратилган имкониятлар тўғрисида батафсил маълумот берилди. Тадбир иштирокчилари учун Миришкор туманининг инвестицион салоҳияти тўғрисида алоҳида тақдимот ўтказилди.

Мулоқот давомида томонлар ўртасида ўзаро ҳамкорликни йўлга қўйиш истиқболлари муҳокама қилинди. Шунингдек, Малайзия компанияси ва ўзбек делегацияси таркибидаги “Sam-Kuala” МЧЖ корхонаси ўртасида Ҳамкорлик Меморандумини имзолаш маросими бўлиб ўтди.

Малайзия компанияси раҳбарияти таклифига биноан Миришкор тумани делегацияси “Essentiq Pharma” компаниясининг ҳамкори, биологик фаол қўшимчалар ишлаб чиқаришга ихтисослашган “Biotropics Malaysia” компаниясининг ишлаб чиқариш корхонасига бориб, иш жараёни билан танишди.

Шунингдек, ишлаб чиқариш фаолияти билан танишилгандан сўнг, Миришкор туман делегацияси ва “Biotropics Malaysia” компанияси раҳбарияти ўртасида ўзаро ҳамкорлик ўрнатиш, хориж томони иштирокида Миришкор туманида қўшма инвестиция лойиҳасини амалга ошириш бўйича музокаралар ўтказилди.

“Biotropics Malaysia” компанияси вакиллари томонлар ўртасидаги ҳамкорликдан манфаатдор эканлиги, қўшма инвестиция лойиҳасини амалга ошириш имкониятларини ўрганиб чиқишини маълум қилди.

Учрашувлар якунида “Sam-Kuala” МЧЖ ва Малайзиянинг “Essentiq Pharma” компанияси ўртасида қўшма корхона тузиш ва ҳамкорлик йўналишларини аниқлаш мақсадида компания раҳбариятининг Ўзбекистонга ташрифини ташкил  этиш, “Biotropics Malaysia” компанияси билан Миришкор туманида хориж томони технологияси асосида қизилмия ўсимлигини қайта ишлаш истиқболларини ўрганиш мақсадида мазкур компанияга қизилмия ўсимлиги намуналарини юбориш тўғрисида келишувларга эришилди.