Қашқадарё вилоятининг Нишон тумани ташкил этилганига 50 йилга яқин муддат тўлиши муносабати билан амалдаги ҳоким Мухтор Ҳайитмуродов собиқ ҳокимларни ёд этди. Уларнинг оила-аъзоларига ҳурмат кўрсатиб, бир дастурхон атрофида тўплади. Бу ҳақда “Дарё”га ҳокимлик ахборот хизмати раҳбари Илёс Маҳмудов хабар берди.
Таъкидланишича, бугун, 9 май куни туманда “Инсон азиз — хотира муқаддас” деб номланган тадбир бўлиб ўтган.
Тадбирда сўз олган туман ҳокими Мухтор Ҳайитмуродов Нишон тумани ташкил этилганига 2025 йилда 50 йил тўлишини эслатиб, туманнинг бугунги кунгача бўлган муваффақиятларида туманга раҳбарлик қилган 7 нафар собиқ раҳбарнинг ҳам ҳиссаси катта эканини таъкидлаган.
.jpg)
“Нишон тумани ташкил топганига 50 йил бўлди. Ортда қолган шу давр мобайнида Сиз азиз нишонликларнинг меҳнатсеварлигингиз, бирдамлигингиз, мардлик ва жасоратларингиз туфайли туманимиз кундан-кунга ривожланиб, янгича чирой очиб бормоқда. Туманнинг шу кунгача эришган ютуқларида собиқ ҳокимлар — Ҳайитмурод Фармонов, Ҳайит Жониев, Аҳмад Муқимов, Равшан Хуррамов, Ориф Тўхтамишов, Рустам Сагдуллаев, Асрор Жўраевларнинг ҳиссаси катта бўлган”, — дейди туманнинг айни кундаги раҳбари Мухтор Ҳайитмуродов.
“Дарё” мухбирининг аниқлаштиришича, 1990 йилдан бошлаб Нишон туманида 9 нафар киши ҳокимлик қилган. Туманнинг айни кундаги раҳбари Мухтор Ҳайитмуродовнинг айни кундаги фаолияти иккинчи ҳокимлик даври ҳисобланиб, Мухтор Ҳайитмуродов 2012 йилдан 2016 йилгача бўлган муддатда ҳам туманни бошқарган.
“Шу туманга раҳбарлик қилган йилларимизда биз ҳокимларда маблағ билан боғлиқ муаммолар бўларди. Кўпинча ўйлаган хайрли ишимизни, халқ учун қилиниши керак бўлган яхши амалларимизни маблағ етишмаслиги сабаб бажаролмай қолардик. Бугунги кунда туман ҳокимларига шахсан давлатимиз раҳбарининг ўзи сўраган маблағини бериб, натижани талаб қилмоқда. Ҳозирда ҳоким бўлиш масъулиятли бўлиши баробарида имкониятлар эгаси бўлиш ҳамдир. Халқ сўраб келган муаммони ечиш учун шахсан президентимизнинг ўзи маблағ ажратиб бераётганликлари ҳокимлар ишини осонлаштирмоқда. Шунинг баробарида президент берган маблағни ўз жойида сарфлашдек масъулиятни ҳам юкламоқда. Бу борада Мухтор акага ҳавас қиламиз ва омад тилаб қоламиз”, — дейди Нишон туманига 1999—2000 йилларда раҳбарлик қилган собиқ ҳоким Аҳмад Муқимов.
Тадбирда айтилишича, Нишон туманида раҳбарлик қилган собиқ ҳокимларнинг икки нафари — Ҳайитмурод Фармонов ҳамда Ҳайит Жониевлар вафот этган. Ориф Тўхтамишов ҳамда Асрор Жўраев каби собиқ раҳбарлар айни кунда вазирликда, бошқармаларда фаолиятини давом эттирмоқда.
Изоҳ (0)