O‘zbekistonda bo‘lib turgan Fransiyaning tashqi savdo, iqtisodiy jozibadorlik va chet eldagi fuqarolar ishlari bo‘yicha delegat vaziri Olive Besht juma kuni bo‘lib o‘tgan matbuot anjumanida ikki davlat o‘rtasidagi hamkorlikning ustuvor yo‘nalishlari haqida gapirdi. Bu haqda “Daryo” muxbiri xabar bermoqda.
Avvalroq Fransiya prezidenti Emmanuel Makronning joriy yilda O‘zbekistonga tashrif buyurishi mumkinligi haqida xabarlar tarqalgan edi. Olive Besht tashrif amalga oshishiga ishonch bildirdi.
Fransiya prezidenti tashrifining aniq sanasi va formati hozircha noma’lum.
Hozirda bu tashrif faqat O‘zbekistongami yoki umuman Markaziy Osiyoga bo‘ladimi, bilmaymiz. Lekin tashrif amalga oshiriladi, chunki biz uni tashkil qilishda hech qanday to‘siq ko‘rmayapmiz, — dedi u.
Bundan tashqari, Fransiya O‘zbekistonda qurilishi rejalashtirilgan atom elektr stansiyasi uchun yangi avlod yadro reaktorlarini taqdim etishga tayyorligini bildirdi.
Fransiya ushbu texnologiyaga qiziqish bildirilsa, O‘zbekistonga yangi avlod EPR-2 yadro reaktorlarini taklif qilishi mumkin, — deb ma’lum qildi Olive Besht.
Anjumandan bir kun avval O‘zbekiston energetika vaziri Jo‘rabek Mirzamahmudov va Besht energetika sohasidagi qo‘shma loyihalarni muhokama qilgan edi.
Biz atom energetika sohasini muhokama qilganimiz yo‘q, chunki O‘zbekiston tomoni bu masalani muzokaralar kun tartibiga kiritmagan. Biz faqat yashil energiya, quyosh panellarini o‘rnatish, gidroenergetika, issiqlik elektr stansiyasini qurish haqida gaplashdik, — dedi Besht O‘zbekiston va Fransiyaning yadroviy sohadagi hamkorligi haqidagi savolga javob berar ekan.
Unga ko‘ra, Fransiyada 56 ta yadro reaktori mavjud. Shuningdek, mamlakat bu sohaga katta sarmoya kiritmoqda. Hozir ular yangi avlod reaktorlarini ishlab chiqarmoqda.
Shuningdek, u energetika, suv ta’minoti va suv resurslarini boshqarish sohalarini hamkorlikning eng faol yo‘nalishlari qatoriga kiritdi. U EDF, Total Eren va Voltalia kabi kompaniyalar tomonidan amalga oshirilayotgan Fransiya va O‘zbekistonning “yashil” energiya bo‘yicha qo‘shma loyihalarini ta’kidladi.
Bundan tashqari, delegat vazir Fransiya kompaniyalarining Toshkentda tramvay yo‘nalishlarini rivojlantirish loyihasida ishtirok etishga tayyorligi haqida gapirdi.
Fransiyaning Alstom kompaniyasi sarmoya kiritishga tayyor va Toshkentdagi tramvay liniyasi loyihasini rivojlantirishga hissa qo‘shadi, — dedi Olive Besht.
Vazir, shuningdek, O‘zbekiston Fransiya fuqarolari uchun jozibadorligini alohida ta’kidladi.
O‘zbekiston Sharq va G‘arb uchrashuvining markazi va u ko‘plab fransuzlarni o‘ziga jalb qiladi. Parijda bo‘lib o‘tgan ko‘rgazmalar ham fransuzlar uchun juda qiziq bo‘ldi. Adashmasam, hozirda O‘zbekistonga har yili 20 ming Fransiya sayyohlari tashrif buyuradi, — deydi u.
Shuningdek, Olive Besht Accor kompaniyasining O‘zbekistondagi mehmonxona biznesidagi ishtirokini, uning fikricha, bu mamlakatda turizmni rivojlantirishga ham hissa qo‘shishini ta’kidladi.
Izoh (0)