Yaponiyadagi oltin narxi investorlarning ushbu aktivga qiziqishi ortib borayotgani fonida o‘zining tarixiy eng yuqori ko‘rsatkichini yangiladi. Bu haqda treyderlar va savdo ma’lumotlariga tayanib “TASS” xabar bermoqda.
Mamlakatdagi eng yirik qimmatbaho metallar ishlab chiqaruvchi va sotuvchi kompaniyalaridan biri Tanaka Kikinzoku 1 gramm oltinning chakana narxini 9 680 iyen (70,45 dollar) qilib belgiladi. Bu Yaponiya uchun tarixdagi eng yuqori narx.
Tokio tovar birjasida seshanba, 2-may kuni oltin fyucherslari narxi taxminan 8 756 iyenni (63,71 dollar) tashkil etmoqda.
Shu bilan birga, Tokio fond birjasidagi savdolar iyenaning dollarga nisbatan qadrsizlanishi davom etayotgani fonida yuqori indekslarda bo‘lmoqda, bu esa yapon eksport ishlab chiqaruvchilari uchun foydalidir.
Oltin nega ko‘tarilmoqda?
AQSH va Yevropadagi bank inqirozi moliyaviy aktivlarga bo‘lgan talabni pasaytirib, qimmatbaho metallarga bo‘lgan talabni oshirdi.
Sodda qilib aytganda, bungacha pullarini bankka omonatga qo‘ygan insonlar bank inqirozi sabab omonatlarini qaytarib olib, qimmatbaho metallar, xususan oltinni xarid qilishmoqda. Bu esa oltinga bo‘lgan talabni ko‘paytirib, narxlar oshishiga olib keladi.
2-may holatiga ko‘ra global oltin narxlari bir troya unsiyasi uchun 1 980 dollar atrofida shakllanmoqda.
Izoh (0)