Ўзбекистонда бўлиб турган Франциянинг ташқи савдо, иқтисодий жозибадорлик ва чет элдаги фуқаролар ишлари бўйича делегат вазири Оlive Бешт жума куни бўлиб ўтган матбуот анжуманида икки давлат ўртасидаги ҳамкорликнинг устувор йўналишлари ҳақида гапирди. Бу ҳақда “Дарё” мухбири хабар бермоқда.
Аввалроқ Франция президенти Эммануэл Макроннинг жорий йилда Ўзбекистонга ташриф буюриши мумкинлиги ҳақида хабарлар тарқалган эди. Оlive Бешт ташриф амалга ошишига ишонч билдирди.
Франция президенти ташрифининг аниқ санаси ва формати ҳозирча номаълум.
Ҳозирда бу ташриф фақат Ўзбекистонгами ёки умуман Марказий Осиёга бўладими, билмаймиз. Лекин ташриф амалга оширилади, чунки биз уни ташкил қилишда ҳеч қандай тўсиқ кўрмаяпмиз, — деди у.
Бундан ташқари, Франция Ўзбекистонда қурилиши режалаштирилган атом электр станцияси учун янги авлод ядро реакторларини тақдим этишга тайёрлигини билдирди.
Франция ушбу технологияга қизиқиш билдирилса, Ўзбекистонга янги авлод EPR-2 ядро реакторларини таклиф қилиши мумкин, — деб маълум қилди Оlive Бешт.
Анжумандан бир кун аввал Ўзбекистон энергетика вазири Жўрабек Мирзамаҳмудов ва Бешт энергетика соҳасидаги қўшма лойиҳаларни муҳокама қилган эди.
Биз атом энергетика соҳасини муҳокама қилганимиз йўқ, чунки Ўзбекистон томони бу масалани музокаралар кун тартибига киритмаган. Биз фақат яшил энергия, қуёш панелларини ўрнатиш, гидроэнергетика, иссиқлик электр станциясини қуриш ҳақида гаплашдик, — деди Бешт Ўзбекистон ва Франциянинг ядровий соҳадаги ҳамкорлиги ҳақидаги саволга жавоб берар экан.
Унга кўра, Францияда 56 та ядро реактори мавжуд. Шунингдек, мамлакат бу соҳага катта сармоя киритмоқда. Ҳозир улар янги авлод реакторларини ишлаб чиқармоқда.
Шунингдек, у энергетика, сув таъминоти ва сув ресурсларини бошқариш соҳаларини ҳамкорликнинг энг фаол йўналишлари қаторига киритди. У EDF, Тотал Эрен ва Voltalia каби компаниялар томонидан амалга оширилаётган Франция ва Ўзбекистоннинг “яшил” энергия бўйича қўшма лойиҳаларини таъкидлади.
Бундан ташқари, делегат вазир Франция компанияларининг Тошкентда трамвай йўналишларини ривожлантириш лойиҳасида иштирок этишга тайёрлиги ҳақида гапирди.
Франциянинг Алстом компанияси сармоя киритишга тайёр ва Тошкентдаги трамвай линияси лойиҳасини ривожлантиришга ҳисса қўшади, — деди Оlive Бешт.
Вазир, шунингдек, Ўзбекистон Франция фуқаролари учун жозибадорлигини алоҳида таъкидлади.
Ўзбекистон Шарқ ва Ғарб учрашувининг маркази ва у кўплаб французларни ўзига жалб қилади. Парижда бўлиб ўтган кўргазмалар ҳам французлар учун жуда қизиқ бўлди. Адашмасам, ҳозирда Ўзбекистонга ҳар йили 20 минг Франция сайёҳлари ташриф буюради, — дейди у.
Шунингдек, Оlive Бешт Accor компаниясининг Ўзбекистондаги меҳмонхона бизнесидаги иштирокини, унинг фикрича, бу мамлакатда туризмни ривожлантиришга ҳам ҳисса қўшишини таъкидлади.
Изоҳ (0)