Farg‘onada mushukni otib, bug‘uni esa bo‘g‘izlab o‘ldirgan shaxsning ov miltig‘i olib qo‘yildi. Bu haqda Tabiat resurslari vazirligi Farg‘ona viloyati boshqarmasi ma’lum qildi.
Ijtimoiy tarmoqlarda nomaʼlum shaxs tomonidan mushuk otib, bug‘u esa bo‘g‘izlab o‘ldirilgani aks etgan suratlar tarqaldi. Boshqarma ma’lumotlariga ko‘ra, ushbu holatga aloqador shaxs Farg‘ona tumani “Marg‘ilon” mahallasida yashovchi fuqaro I.Sh. hisoblanadi.
O‘rganish jarayonida u 2011—2021-yillarda Janubiy Koreyada ishlagani, ijtimoiy tarmoqlarda o‘zi tomonidan eʼlon qilingan suratlardagi holat o‘sha davrda ro‘y bergani ma’lum bo‘lgan. Shuningdek, uning aytishicha, ikki yil avval Janubiy Koreyadan qaytgach, xonadonida inkubator yordamida tovuq jo‘jalarini ko‘paytirish bilan shug‘ullangan. Mushuk esa o‘sha paytda “jo‘jalarni yeb ketayotgani uchun” pnevmatik ov quroli bilan otib, nobud qilingan.
Tuman IIB tomonidan fuqaro I.Sh.ga tegishli ov quroli belgilangan tartibda olib qo‘yilgan. Holat yuzasidan to‘plangan hujjatlar belgilangan tartibda huquqiy baho berish uchun huquq-tartibot organlariga taqdim etilgan.
Boshqarma xabarida bug‘uning bo‘g‘izlanishi bilan bog‘liq holatga izoh berilmagan.
Hayvonlarga nisbatan shafqatsiz munosabat
Mart boshlarida Toshkent viloyatidagi uylarning birida itlar shafqatsizlarcha so‘yilib, terisi shilib olingani aniqlangandi. Shuningdek, Olmaliqda itga shafqatsiz munosabatda bo‘lganlarga qarshi chiqqani uchun jazo tayinlangan shaxslar oqlangani, Navoiyda noma’lum shaxslar itni Damas’ga bog‘lab, shahar bo‘ylab sudragani, “Surxon” qo‘riqxonasidan Buxoro tog‘ qo‘yining bolasini noqonuniy olib ketgan brakonyerlar ushlangani to‘g‘risida xabarlar berilgan edi.
Izoh (0)