Surxondaryo viloyati Sariosiyo tumanida sodir bo‘lgan yo‘l-transport hodisasi oqibatida bir kishi halok bo‘ldi. Bu haqda viloyat IIB YHXB axborot xizmati xabar berdi.
Qayd etilishicha, 5-may kuni soat 15:30 larda Sariosiyo tumanida yashovchi 26 yoshli Q.B. JBC rusumli avtomashinasini mahalliy 4N-1581 yo‘lining 6-kilometri, “Kelajak sari” mahallasi hududida boshqarayotganda mast holda yo‘lning o‘ngdan chap qismiga kesib o‘tayotgan uch piyodani avtomashinasi bilan turtib yuborgan.
YTH natijasida fuqarolar M.Q. va Z.T. tan jarohati olib, tuman shoshilinch tez tibbiy yordam bo‘limiga yotqizilgan. Kasalxonada 1979-yilda tug‘ilgan fuqaro M.Q. olgan og‘ir tan jarohati oqibatida vafot etgan.
Holat yuzasidan Sariosiyo tumani IIB Tergov guruhi tomonidan jinoyat ishi qo‘zg‘atilib, hozirda dastlabki tergov harakatlari olib borilmoqda.
Piyodalar bilan bog‘liq yo‘l-transport hodisalari
Yanvar boshlarida Toshkent viloyatida yo‘l chetidagi ikki kishi “Jiguli” urib yuborishi oqibatida vafot etgandi. Shuningdek, Farg‘ona viloyatida ham 2 piyoda o‘limi bilan bog‘liq yo‘l-transport hodisalari sodir bo‘lgan edi. Samarqandda Damas urib yuborgan ikki nafar piyoda shifoxonada vafot etgan, Toshkentda Lacetti piyodalar o‘tish joyidan o‘tayotgan 47 yoshli ayolni urib yuborgandi.
Izoh (0)