Ijtimoiy tarmoqlarda Navoiy viloyati Zarafshon shahrida noma’lum shaxslar itni Damas’ga bog‘lab, shahar bo‘ylab sudrab olib ketayotgani aks etgan videolar tarqaldi. Shahar hokimligi axborot xizmati ushbu holat yuzasidan rasmiy ma’lumot berdi.
Ijtimoiy tarmoqlarning birida e’lon qilingan “Zarafshondagi vahshiylik” sarlavhali yoritilgan murojaat yuzasidan quyidagilarni ma’lum qilamiz. Mazkur murojaat soha mutaxassislari tomonidan nazoratga olindi. Ushbu muammoni bartaraf etish choralari ko‘riladi, — deyilgan munosabatda.
“Mehr va oqibat” hayvonlarni muhofaza qilish jamiyatiga ham ushbu holat yuzasidan murojaat kelib tushgan. Fuqaroning xabar berishicha, uning farzandi ko‘rgan voqeasidan qo‘rqib ketgan. “Mashina orqasiga it bog‘langan holda ketayotgan edi. Bolam endi ko‘chaga ham chiqmaydi, it o‘ldirilgan deb yig‘layapti”, — deydi murojaatchi.
Nodavlat-notijorat tashkiloti rahbariyati Ichki ishlar vazirligidan ushbu vaziyat bo‘yicha qonunga muvofiq choralar ko‘rishni so‘ragan.
Izoh (0)