“Surxon” davlat qo‘riqxonasidan Buxoro tog‘ qo‘yining bolasini noqonuniy olib ketishga uringan ikki erkak qo‘lga olindi. Bu haqda Tabiat resurslari vazirligi ma’lum qildi.
Qo‘lga olingan shaxslar Qashqadaryo viloyatining Dehqonobod tumani “Xo‘jamahmud” mahallasida istiqomat qiluvchi A.J. va “Chuchuqquduq” mahallasida yashovchi fuqaro G‘.J. ekani ma’lum bo‘lgan. Buxoro tog‘ qo‘yi O'zbekiston “Qizil kitobi”ga kiritilgan.
Mazkur holat yuzasidan tegishli hujjatlar rasmiylashtirilib, bir bosh Buxoro tog‘ qo‘yi bolasi huquqbuzarlardan olib qo‘yilgan. Huquqbuzarlarga nisbatan Ma’muriy javobgarlik to‘g‘risidagi kodeksning 82-moddasi (muhofaza etiladigan tabiiy hududlarning rejimini buzish) 1-qismiga asosan ma’muriy bayonnoma rasmiylashtirilgan.
.jpg)
“Qonuniy to‘xtamga kelgunga qadar Buxoro tog‘ qo‘yining bolasi veterinariya nazoratida qo‘riqxonada saqlanmoqda”, — deyiladi xabarda.
Aniqlangan holat yuzasidan birlamchi hujjatlar rasmiylashtirilib, huquqni muhofaza qilish organlariga taqdim etish uchun tayyorlanmoqda.
2022-yil fevralda Qoraqalpog‘istonda ikki kishi “Qizil kitob”ga kiritilgan Buxoro bug‘usini noqonuniy ovlagani aniqlangandi. Navoiyda esa “Qizil kitob”ga kiritilgan qushlarni ovlagan brakonyer ushlangani, Jizzaxda brakonyer departament bo‘lim boshlig‘ining ustiga mashina haydab, unga jarohat yetkazgani to‘g‘risida xabar berilgandi.
Izoh (0)