Фарғонада мушукни отиб, буғуни эса бўғизлаб ўлдирган шахснинг ов милтиғи олиб қўйилди. Бу ҳақда Табиат ресурслари вазирлиги Фарғона вилояти бошқармаси маълум қилди.
Ижтимоий тармоқларда номаълум шахс томонидан мушук отиб, буғу эса бўғизлаб ўлдирилгани акс этган суратлар тарқалди. Бошқарма маълумотларига кўра, ушбу ҳолатга алоқадор шахс Фарғона тумани “Марғилон” маҳалласида яшовчи фуқаро И.Ш. ҳисобланади.
Ўрганиш жараёнида у 2011—2021 йилларда Жанубий Кореяда ишлагани, ижтимоий тармоқларда ўзи томонидан эълон қилинган суратлардаги ҳолат ўша даврда рўй бергани маълум бўлган. Шунингдек, унинг айтишича, икки йил аввал Жанубий Кореядан қайтгач, хонадонида инкубатор ёрдамида товуқ жўжаларини кўпайтириш билан шуғулланган. Мушук эса ўша пайтда “жўжаларни еб кетаётгани учун” пневматик ов қуроли билан отиб, нобуд қилинган.
Туман ИИБ томонидан фуқаро И.Ш.га тегишли ов қуроли белгиланган тартибда олиб қўйилган. Ҳолат юзасидан тўпланган ҳужжатлар белгиланган тартибда ҳуқуқий баҳо бериш учун ҳуқуқ-тартибот органларига тақдим этилган.
Бошқарма хабарида буғунинг бўғизланиши билан боғлиқ ҳолатга изоҳ берилмаган.
Ҳайвонларга нисбатан шафқатсиз муносабат
Март бошларида Тошкент вилоятидаги уйларнинг бирида итлар шафқатсизларча сўйилиб, териси шилиб олингани аниқланганди. Шунингдек, Олмалиқда итга шафқатсиз муносабатда бўлганларга қарши чиққани учун жазо тайинланган шахслар оқлангани, Навоийда номаълум шахслар итни Damas’га боғлаб, шаҳар бўйлаб судрагани, “Сурхон” қўриқхонасидан Бухоро тоғ қўйининг боласини ноқонуний олиб кетган браконьерлар ушлангани тўғрисида хабарлар берилган эди.
Изоҳ (0)