1997-yilda “Titanik” filmi ekranlarga chiqdi, keyinchalik mazkur film kinoning haqiqiy afsonasiga aylandi. Butun dunyoni larzaga solgan, millionlab yuraklarni zabt etgan va ko‘plab mukofotlarni, jumladan 11 ta “Oskar”ni qo‘lga kiritgan fojiali halokat fonida tasvirlangan sevgi hikoyasi hech kimni befarq qoldirmadi. Filmning kadrorti hikoyachisi keksaygan Rouz rolini iste'dodli aktrisa Gloriya Styuart o‘ynagan.
Gloriya Styuart o‘rta maktabda o‘qib yurgandayoq aktrisalik faoliyatini boshlagan. 1932-yilda universitetni tugatgach, Universal Pictures bilan shartnoma imzolaydi va kinokompaniyaning ko‘plab filmlarida, masalan, “Eski qorong‘i uy”, “Ko‘rinmas odam” kabi filmlarda rol o‘ynaydi. U “Uch mushketyor” musiqiy komediyasida qirolicha Anna rolini ham ijro etgan.
Biroq 30-yillarning oxiri va 40-yillarning boshlarida Styuart ekranlarda sezilarli darajada kamroq ko‘rina boshladi. 1939-yil boshida aktrisa turmush o‘rtog‘i Artur Shikman bilan 4 oy davomida Osiyo, Misr va Italiyaga sayohat qiladi. 1940-yil o‘rtalarida Gloriya kinoga qaytadi, ammo u karyerasining eng muvaffaqiyatli davridagi singari ko‘p rol ijro qilmaydi. Oradan bir necha yil o‘tib esa suratga olish jarayonlaridan charchaganini ma’lum qiladi. Barcha yangi ssenariylar bilan tanishib chiqib, keskin rad qilganidan keyin bekorga vaqt sarflayotganlarini tushunib yetgan Gollivuddagilar uni tinch qo‘yishga qaror qilishadi.
Keyinchalik u aktrisalik karyerasini tashlab, o‘zini badiiy san’atda sinab ko‘radi. Dastlab dekupaj (dekoratsiya texnikasi), keyin esa rasm chizish, kitob yozish, hatto bonsay san’ati (mitti daraxtning aniq nusxasini yasash) bilan shug‘ullanadi. U tomonidan chizilgan kartinalar Nyu-York, AQSH va Yevropaning boshqa yirik shaharlarida galereyalardan o‘rin olgan. Kitoblarini esa o‘z hisobidan chop ettiradi. Adadi kam bo‘lgan kitoblardan tushgan mablag‘ kundalik xarajatlar uchungina yetgan.
Karyerasidagi uzoq tanaffusdan keyin 1975-yilda katta ekranlarga qaytgan aktrisa 1982-yilda “Mening eng yaxshi yilim”da suratga tushadi. 1997-yilning may oyida esa Jeyms Kemeronning “Titanik” filmida rol ijro qilish uchun taklif qilinadi. Ertasi kuni kasting direktori bilan suhbatlashgandan so‘ng, Kemeronning o‘zi videokamera bilan uning oldiga keladi. Uning so‘zlariga ko‘ra, keksa Rouz rolini rejissor nazarda tutgan hamdardlik va muloyimlik bilan o‘qiy olishiga ishonchi komil edi. Bir haftalik ishi uchun suratga olish maydonchasidagi eng keksa aktrisa 10 ming dollar gonorar oladi.
Natijada mazkur roli sabab Gloriya Styuart juda ko‘p mukofotlarga, jumladan “Oltin globus” va “Eng yaxshi ikkinchi plandagi aktrisa” uchun Akademiya mukofotiga nomzod bo‘ladi. Ushbu nufuzli marosimda ishtirok etgan sanoqli oltin asr yulduzlaridan biri bo‘lishdan tashqari, 2022-yil holatiga ko‘ra Gloriya 87 yoshda bu toifadagi eng keksa nomzod bo‘lib qolmoqda.
95 yoshida aktrisaga o‘pka saratoni tashxisi qo‘yiladi. Shunga qaramay u kasallikka jiddiy e’tibor bermaydi. Yoshi sabab suratga tushmay qo‘ygan va kamdan-kam hollarda intervyu bergan aktrisa 100 yillik yubileyini 2010-yilda Los-Anjelesdagi ACE galereyasida nishonlaydi. Bayramda oila va do‘stlardan tashqari Jeyms Kemeron ham ishtirok etadi. Galereyada aktrisa tomonidan yaratilgan san’at asarlari: rasmlar, ipakdan tayyorlangan buyumlar, dekupaj namunalari va bonsay kolleksiyasidagi daraxtlar namoyish etiladi.
Kino sanoatiga qo‘shgan hissasi uchun Styuart Gollivudning Shon-sharaf xiyobonida yulduziga ega. Uning yulduzi Gollivud xiyobonining 6700-mavzesida joylashgan. Aktrisa 2010-yil 26-sentabrda nafas yetishmovchiligidan vafot etadi. Qaysidir ma’noda Styuart o‘z qahramonining taqdirini takrorladi: u 100 yil yashadi.
Izoh (0)