1997 йилда “Титаник” фильми экранларга чиқди, кейинчалик мазкур фильм кинонинг ҳақиқий афсонасига айланди. Бутун дунёни ларзага солган, миллионлаб юракларни забт этган ва кўплаб мукофотларни, жумладан 11 та “Оскар”ни қўлга киритган фожиали ҳалокат фонида тасвирланган севги ҳикояси ҳеч кимни бефарқ қолдирмади. Фильмнинг кадрорти ҳикоячиси кексайган Роуз ролини истеъдодли актриса Глория Стюарт ўйнаган.
Глория Стюарт ўрта мактабда ўқиб юргандаёқ актрисалик фаолиятини бошлаган. 1932 йилда университетни тугатгач, Universal Pictures билан шартнома имзолайди ва кинокомпаниянинг кўплаб фильмларида, масалан, “Эски қоронғи уй”, “Кўринмас одам” каби фильмларда роль ўйнайди. У “Уч мушкетёр” мусиқий комедиясида қиролича Анна ролини ҳам ижро этган.
Бироқ 30 йилларнинг охири ва 40 йилларнинг бошларида Стюарт экранларда сезиларли даражада камроқ кўрина бошлади. 1939 йил бошида актриса турмуш ўртоғи Артур Шикман билан 4 ой давомида Осиё, Миср ва Италияга саёҳат қилади. 1940 йил ўрталарида Глория кинога қайтади, аммо у карьерасининг энг муваффақиятли давридаги сингари кўп роль ижро қилмайди. Орадан бир неча йил ўтиб эса суратга олиш жараёнларидан чарчаганини маълум қилади. Барча янги сценарийлар билан танишиб чиқиб, кескин рад қилганидан кейин бекорга вақт сарфлаётганларини тушуниб етган Голливуддагилар уни тинч қўйишга қарор қилишади.
Кейинчалик у актрисалик карьерасини ташлаб, ўзини бадиий санъатда синаб кўради. Дастлаб декупаж (декорация техникаси), кейин эса расм чизиш, китоб ёзиш, ҳатто бонсай санъати (митти дарахтнинг аниқ нусхасини ясаш) билан шуғулланади. У томонидан чизилган картиналар Нью-Йорк, АҚШ ва Европанинг бошқа йирик шаҳарларида галереялардан ўрин олган. Китобларини эса ўз ҳисобидан чоп эттиради. Адади кам бўлган китоблардан тушган маблағ кундалик харажатлар учунгина етган.
Карьерасидаги узоқ танаффусдан кейин 1975 йилда катта экранларга қайтган актриса 1982 йилда “Менинг энг яхши йилим”да суратга тушади. 1997 йилнинг май ойида эса Жеймс Кемероннинг “Титаник” фильмида роль ижро қилиш учун таклиф қилинади. Эртаси куни кастинг директори билан суҳбатлашгандан сўнг, Кемероннинг ўзи видеокамера билан унинг олдига келади. Унинг сўзларига кўра, кекса Роуз ролини режиссёр назарда тутган ҳамдардлик ва мулойимлик билан ўқий олишига ишончи комил эди. Бир ҳафталик иши учун суратга олиш майдончасидаги энг кекса актриса 10 минг доллар гонорар олади.
Натижада мазкур роли сабаб Глория Стюарт жуда кўп мукофотларга, жумладан “Олтин глобус” ва “Энг яхши иккинчи пландаги актриса” учун Академия мукофотига номзод бўлади. Ушбу нуфузли маросимда иштирок этган саноқли олтин аср юлдузларидан бири бўлишдан ташқари, 2022 йил ҳолатига кўра Глория 87 ёшда бу тоифадаги энг кекса номзод бўлиб қолмоқда.
95 ёшида актрисага ўпка саратони ташхиси қўйилади. Шунга қарамай у касалликка жиддий эътибор бермайди. Ёши сабаб суратга тушмай қўйган ва камдан-кам ҳолларда интервью берган актриса 100 йиллик юбилейини 2010 йилда Лос-Анжелесдаги ACE галереясида нишонлайди. Байрамда оила ва дўстлардан ташқари Жеймс Кемерон ҳам иштирок этади. Галереяда актриса томонидан яратилган санъат асарлари: расмлар, ипакдан тайёрланган буюмлар, декупаж намуналари ва бонсай коллекциясидаги дарахтлар намойиш этилади.
Кино саноатига қўшган ҳиссаси учун Стюарт Голливуднинг Шон-шараф хиёбонида юлдузига эга. Унинг юлдузи Голливуд хиёбонининг 6700-мавзесида жойлашган. Актриса 2010 йил 26 сентябрда нафас етишмовчилигидан вафот этади. Қайсидир маънода Стюарт ўз қаҳрамонининг тақдирини такрорлади: у 100 йил яшади.
Изоҳ (0)