Қозоғистон президенти Қосим-Жўмарт Тўқаевга Халқаро футбол федерацияси (ФИФА) президенти Жанни Инфантино футболка ва тўп совға қилди. Бу ҳақда Оқўрдага таяниб, “Дарё”нинг Қозоғистондаги мухбири хабар берди.
Томонлар мамлакат футболи салоҳиятини ошириш ва ёшлар спортини ривожлантириш масалаларини муҳокама қилган.
“Сизнинг ташрифингиз Қозоғистон футболини ривожлантириш нуқтаи назаридан жуда муҳим, деб ҳисоблайман. Дунёдаги энг оммабоп ва томошабоп спорт тури бўлган футболни ривожлантириш йўлида кўп ишлар қилаётганингизни биламан.
Саъй-ҳаракатларингизни қадрлаймиз ва ФИФА президенти сифатида сизни қўллаб-қувватлаймиз. Сиз билан яхши ҳамкорликни давом эттириш ниятидамиз”, — деган Қозоғистон раҳбари.
Ўз навбатида, Жанни Инфантино ФИФА ўзининг муваффақиятли тажрибаси билан ўртоқлашишга ва Қозоғистон футболи ривожига кўмаклашишга тайёрлигини айтган.
“Қозоғистонга биринчи ташрифим эмас, аммо ФИФА президенти сифатида биринчиси ҳисобланади. Шунинг учун сиз билан учрашиш мен учун катта шарафдир. Бу гўзал мамлакатнинг барча аҳолиси каби сиз ҳам футболни яхши кўришингизни биламан. Биргаликда ажойиб ишларни қила оламиз.
Қозоғистон нафақат минтақавий миқёсда, балки жаҳон миқёсида жуда муҳим давлатга айланди. ФИФА учун бу ажойиб ҳамкор. Биргаликда ишлашимиз керак, чунки футбол бу мамлакатда жамият интеграцияси, шунингдек, бошқа мамлакатлардан келган одамларни бирлаштириш учун катта имкониятлар яратади”, — деди Жанни Инфантино.
Учрашув сўнгида Инфантино Қозоғистон етакчисига 10-рақамли футболка ва тўп совға қилган. Президент матбуот хизмати бу рақам Пеле, Марадона, Зидан ва бошқа афсонавий футболчилар шу рақамда ўйнагани учун танланганини айтган.
Талгат Сотиболди, Остона
Изоҳ (0)