Ўзбекистон қишлоқ хўжалиги вазири Азиз Воитов 2 май куни Берлинда бўлиб ўтган Германия—Ўзбекистон бизнес-форум юзасидан ўз фикрларини билдириб ўтди. Бу ҳақда “Дарё” мухбири хабар берди.
Хусусан, вазир бизнес-форум жуда кўтаринки руҳда бўлиб ўтганини айтди.
“Икки мамлакатнинг тадбиркорлари, масъул идора вакиллари ўртасида шартномалар имзоланди, келишувларга эришилди. Жумладан, қишлоқ хўжалиги йўналишида гапирадиган бўлсам, биз кўп томонлама масалаларни келишиб олдим. Бунда ҳам илм йўналишида ўзимизни талабаларимизни ўқитиш, яъни икки томонлама талабалар алмашинуви бўйича, ветеренария ҳамда паррандачилик соҳасида келишувларга эришдик”, — дейди у.
Азиз Воитовнинг айтишича, рақамлаштириш соҳасида “БайWа” компанияси билан шартнома имзоланган.
“Big Дутчман” компанияси билан паррандачилик соҳасидаги ускуналарни нафақат етказиб бериш, балки уларни Ўзбекистонда ишлаб чиқариш, хизмат кўрсатиш ҳамда талабаларимиз ва ишлаб чиқаришда ишлаётган ходимларимизни ўқитиш масалалари ҳам келишиб олинди. Энг асосийси, немис банклари билан ушбу лойиҳаларни молиялаштириш бўйича ҳам узоқ муддатли келишувларга эришдик.
Ҳозирги вақтда 118 млн долларлик 6 та шартнома имзоланди. Бундан ташқари 100 млн долларга яқин экспорт шартномалари имзоланиш арафасида", — дея қўшимча қилади қишлоқ хўжалиги вазири.
Изоҳ (0)