“Sog‘liqni saqlash tizimini raqamlashtirishga doir qo‘shimcha chora-tadbirlar to‘g‘risida”gi prezident qarori qabul qilindi.
Qarorga ko‘ra, O‘zbekiston va Germaniyaning KfW banki o‘rtasida “Raqamli sog‘liqni saqlash islohotlarini qo‘llab-quvvatlash” loyihasi uchun 5 yillik imtiyozli davr bilan 12 yil muddatga 45 million yevro miqdorida qarz bitimi hamda 5,5 million yevro miqdorida grant bitimi imzolandi.
Sog‘liqni saqlash vazirligi loyihani o‘z vaqtida amalga oshirish hamda muvofiqlashtirish bo‘yicha mas’ul ijro etuvchi organ hisoblanadi. Loyihani o‘z vaqtida va samarali amalga oshirish uchun Raqamli sog‘liqni saqlash tizimini boshqarish loyiha ofisi tashkil etiladi.
Qarz mablag‘larini qaytarish respublika budjeti mablag‘lari hisobidan qoplanadi.
Shuningdek, qarorga ko‘ra:
- loyiha doirasida joriy etilayotgan axborot tizimlaridan foydalanish bo‘yicha litsenziyalar uchun to‘lovlar ularni joriy etish xarajatlari tarkibiga kiritiladi hamda ular axborot tizimi amaliyotga to‘liq joriy etilgandan so‘ng kamida 5 yil mobaynida amal qiladi;
- loyihani amalga oshirish jarayonida iqtisod qilingan mablag‘lar ustuvor ravishda birlamchi tibbiy-sanitariya yordami muassasalari faoliyatini raqamlashtirish hamda kompyuter texnikasi vositalarini xarid qilishga yo‘naltiriladi.
Germaniyaning KfW banki bilan O‘zbekistonda sog‘liqni saqlash muassasalarini modernizatsiya qilish, zamonaviy asbob-uskunalar bilan jihozlash, muqobil energiya manbalarini ishga tushirish va tibbiy taʼlim bo‘yicha umumiy qiymati 175 million yevroga teng 7 ta investitsiyaviy hamda grant loyihasi amalga oshirilmoqda. Jumladan, “Reproduktiv salomatlik, onalik va bolalikni muhofaza qilish” loyihasi mamlakatda ixtisoslashgan pediatriya xizmatini yaxshilashga qaratilgan.
Izoh (0)